Dövlət İmtahan Mərkəzində (DİM) imtahan nəticələri ilə bağlı müraciətlərin araşdırılması məqsədilə Apellyasiya Komissiyası fəaliyyət göstərəcək.
Bu barədə "Təhsil365"in sorğusuna cavab olaraq Dövlət İmtahan Mərkəzindən məlumat verilib. Bildirilib ki, Komissiyaya müraciət etmək istəyənlər 14–16 aprel tarixlərində DİM-in rəsmi saytında yerləşdiriləcək elektron ərizəni doldurmaqla qeydiyyatdan keçməlidirlər. Qeyd olunan tarixlərdən sonra müraciət imkanı olmayacaq.
Elektron ərizədə müraciət edilən tapşırığın nömrəsi, müraciətin məzmunu və bu məzmunun qiymətləndirmə meyarının hansı bəndinə uyğun olduğu aydın şəkildə qeyd olunmalıdır. Əgər ərizədə bu məlumatlar əks etdirilməzsə, müraciət qəbul edilmir və araşdırılmır.
Apellyasiya prosesi aşağıdakı ardıcıllıqla həyata keçiriləcək:
Komissiya tərəfindən bütün müraciətlər araşdırılacaq;
Hər müraciətə aid ekspert rəyi yazılı şəkildə hazırlanaraq əlavə ediləcək;
Müraciət edən şəxslərə apellyasiya prosesinin nəticəsi ilə bağlı “sms” göndəriləcək.
Daha sonra abituriyentlər apelyasiya.dim.gov.az saytında öz ərizələrinə daxil olaraq nəticələrlə tanış ola və ekspert rəyini çap edə biləcəklər.
Qeyd edək ki, cavab vərəqində təlimata uyğun olmayan formada edilmiş işarələr və ya texniki səhvlər (məsələn, bir sualda iki cavab dairəsinin qaralanması və s.) üzrə edilən müraciətlərə baxılmayacaq.
Müraciət etməzdən əvvəl abituriyentlərə tövsiyə olunur ki, DİM-in saytında yerləşdirilən nəticələr, cavab vərəqlərinin qrafik təsviri, açıq tipli suallar üzrə qiymətləndirmə meyarları və izahlarla tanış olsunlar (https://eservices.dim.gov.az/ejurnal/).
Ötən illərin təcrübəsinə əsasən, apellyasiya müraciətlərinin təxminən 15%-i tapşırığa heç bir cavab verilmədən və ya qiymətləndirmə meyarlarına baxılmadan təqdim edilib. Belə müraciətlərə baxılmayacağı bir daha abituriyentlərin diqqətinə çatdırılır.