Çin Elmlər Akademiyasının astronomları Süd Yolu yaxınlığında görünməyən maddədən ibarət qeyri-adi obyekt aşkar ediblər.
“Tehsil365” “Science Advances” jurnalına istinadən xəbər verir ki, bu, əvvəlcə sadəcə qaz buludu kimi görünən, lakin ulduzsuz, demək olar ki, tamamilə "qaranlıq maddədən" ibarət olan qaranlıq qalaktika ola bilər.
Araşdırılan obyekt AC-I adlı yüksəksürətli qaz bulududur. Belə buludların supernova partlayışları və ya kiçik qalaktikaların dağılması kimi kosmik hadisələr nəticəsində yarandığı düşünülür. Bu qaz Süd Yoluna doğru hərəkət edərək qalaktikadakı ulduz yaranma prosesini sürətləndirir.
Lakin alimlər 500 metrlik nəhəng “FAST” radioteleskopu ilə müşahidələr zamanı buludun daxilində daha kiçik və fərqli bir struktur – AC G185.0-11.5 obyektini aşkarlayıblar. Bu, ulduzları olmayan, lakin qalaktika kimi fırlanan böyük kütləli (300 milyon Günəş kütləsi) bir obyektdir. Onun mərkəzi və kənar hissələri seçilə bilir və Yerdən təqribən 900 min işıq ili uzaqlığında yerləşdiyi müəyyən edilib.
Alimlərə görə, bu strukturun yalnız 5%-i görünən (barion) maddədən ibarətdir, qalan hissəsi isə görünməyən maddədir. Bu da onu “qaranlıq” qalaktika edir. Belə qalaktikalar indiyədək müşahidə olunmadığından beynəlxalq elmi ictimaiyyət bu nəticəyə ehtiyatla yanaşır.
Tədqiqatçılar obyektin dəqiq təyini üçün gələcəkdə "Ceyms Uebb" kosmik teleskopu kimi digər vasitələrlə də müşahidələr aparmaq niyyətindədirlər. Əgər bu təsdiqlənsə, AC G185.0-11.5 qaranlıq maddənin öyrənilməsi üçün unikal bir kosmik laboratoriyaya çevrilə bilər.