Yanvarın 30-da Dövlət İmtahan Mərkəzi tərəfindən elektron qaydada keçirilən növbəti imtahanda iştirak üçün 268 nəfər qeydiyyatdan keçib və onların 241-i imtahanda iştirak edib. 19 ixtisas üzrə ümumi müvəffəqiyyət göstəricisi 50% (120 nəfər) təşkil edib.
“Tehsil365” xəbər verir ki, bu barədə Təhsildə Keyfiyyət Təminatı Agentliyinin (TKTA) “2025-ci ilin I rübü üzrə elektron bülleten”ində məlumat verilib.
Bülletendə bildirilib ki, ixtisaslar üzrə imtahanda iştirak edən və keçid balını toplayan namizədlərin statistikası nəzərdən keçirildikdə müraciət sayına görə ən çox imtina cavabı “Hüquqşünaslıq” ixtisası üzrə qeydə alınıb.
Belə ki, “Hüquqşünaslıq” ixtisası üzrə imtahanda iştirak edən 113 nəfərin yalnız 15-i uğurlu nəticə əldə edib. Uğursuz nəticə göstərən namizədlər əsasən iki ölkənin ali təhsil müəssisələrinin məzunlarıdır.
Ukrayna ali təhsil müəssisələrindən əldə edilmiş “Hüquqşünaslıq” ixtisası üzrə kvalifikasiyalarla peşə tanınması üçün müraciət edən namizədlərin 94%-i, Rusiya ali təhsil müəssisələrinin məzunlarının isə 84%-i imtahanda uğur qazana bilməyib.
Başqa sözlə, Ukrayna ali məktəblərindən “Hüquqşünaslıq” ixtisası üzrə diplom alaraq peşə tanınması imtahanında iştirak edən 64 nəfərin yalnız 4-ü, Rusiyadan isə 38 iştirakçının yalnız 6-sı təqdim olunan 30 sualdan 15 və daha çoxuna düzgün cavab verə bilib.