Mayın 13-də Azərbaycan Memarlıq və İnşaat Universitetində (AzMİU) “Elmdə addımlar: TEC günləri” çərçivəsində tələbələrin bilik və bacarıqlarını inkişaf etdirməyə yönəlmiş “Gələcəyin qurucuları” adlı yeni layihənin icrasına başlanılıb.
“Tehsil365” xəbər verir ki, layihənin ilk günü keçirilən sessiyalar öyrədici, maarifləndirici və praktik yönümlü tədbirlərlə yadda qalıb. Gündəlik proqram çərçivəsində “Dashyunu” MMC, “İZOFASAD” MMC, “Penoplex” və “HOLCİM” kimi tikinti sektorunun aparıcı şirkətlərinin nümayəndələri tələbələrlə görüşərək müasir tikinti materialları və texnologiyalar barədə ətraflı təqdimatlar ediblər.
Universitetin həyətində təşkil olunan xüsusi yarış isə layihəyə əlavə rəng qatıb. İnşaat, Su təsərrüfatı və mühəndis kommunikasiya sistemləri fakültələrindən 40 tələbə (hər fakültədən 20 nəfər) bu yarışa qoşulub. Yarışda 8 komanda iştirak edib və hər komanda 5 tələbədən ibarət olub. Komandalar inşaat və izolyasiya sahəsində ixtisaslaşmış şirkət nümayəndələrinin hazırladığı tapşırıqları müəyyən vaxt çərçivəsində yerinə yetirməyə çalışıblar.
Yarış zamanı tələbələr müxtəlif praktik fəaliyyətlərlə məşğul olub, real iş şəraitinə yaxın simulyasiyalar vasitəsilə bacarıqlarını nümayiş etdiriblər. Ən yaxşı nəticə göstərən tələbələrə şirkətlər tərəfindən hədiyyələr təqdim olunub. Bu yarış tələbələrin həm komanda ruhunu gücləndirib, həm də nəzəri biliklərini praktikaya tətbiq etmələri baxımından faydalı olub.
Mayın 14-də layihə “HOLCİM Academy” nümayəndəsinin təqdimatında keçiriləcək təlimlə davam edəcək. Təlim zamanı tələbələr sement və tikinti texnologiyalarındakı yeniliklərlə tanış olacaqlar. Ardınca “GEOTEST” MMC tərəfindən təşkil olunacaq sessiyalarda geotexniki araşdırmalar və torpaq mühəndisliyi sahəsində praktik biliklər tələbələrlə paylaşılacaq.
Mayın 15-də isə İnşaat konstruksiyaları kafedrasının müdiri professor Muxlis Hacıyev tələbələr üçün təlim keçirəcək. Daha sonra universitetin müasir laboratoriyalarında tələbələrlə birgə sınaqlar aparılacaq.
“Gələcəyin qurucuları” layihəsi sənaye və universitet arasında əməkdaşlığın gücləndirilməsi, tələbələrin real iş mühiti ilə tanış olması və gələcək peşəkar inkişaflarına dəstək verilməsi baxımından önəmli təşəbbüsdür. Layihə gənclərə bilik, təcrübə və motivasiya qazandırmaqla onların gələcəyinə dəyərli töhfə verir, sənaye və universitet əməkdaşlığının bariz nümunəsi kimi çıxış edir.
