“Bizim yaxşı başlanğıcı, nailiyyəti qeyd etmək kimi el adətimiz var. Ancaq qeyd etmənin də bir əndazəsi var. Bu indi məktəblərə də gəlib çatıb”.
“Tehsil365” xəbər verir ki, bunu Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu İctimai TV-də yayımlanan “Sabaha saxlamayaq” verilişində qonaq olarkən deyib.
O bildirib ki, “Son zəng” tədbirinin şouya çevrilməsi kritik həddə çatıb ki, artıq bu qədər protokollar, təlimatlar göndərilib və cəmiyyətdə belə əks-səda yaradır:
“Çox sevdiyim aforizm var – “Bir uşağı böyütmək üçün bir kənd lazımdır”. Tək məktəb deyil, cəmiyyət olaraq hamımızın işidir ki, biz məktəbdə qeyri-konsumerizm mədəniyyəti, uşaqlarımızı səlahiyyətləndirmək mədəniyyəti formalaşdıraq. Uşaqlarımız üçün işləməyək, uşaqlarla birlikdə işləməyə başlayaq. Uşaqları öyrədək ki, bu cür tədbirlərə özləri rejissorluq etsinlər, kreativlik göstərsinlər.
Son zamanlar görürsünüz, məktəblərin hamısı bahalı şarlarla bəzədilir, fişəng atırlar, dronla videoçəkiliş aparırlar, musiqi kollektivləri çağırırlar, xüsusi xoreoqraf gəlib aylarla onlarla işləyir. Bir tərəfdən cəmiyyət olaraq bizi konsumerizm boğur, ikinci tərəfdən də biz uşaqlarımızı tüfeyli kimi böyütmürükmü? Bunlar artıq 17-18 yaşında uşaqlardır. Onlar sabah tamamilə sərbəst həyata başlayacaqlar. Bu şou ilə biz nə etmək istəyirik? Bunun təhsilin keyfiyyətinə, uşağın insan kimi formalaşmasına hansı xeyiri var?”
V.Yaqublu qeyd edib ki, “Son zəng” tədbirinin mütləq bir şərtləri var ki, məktəb rəhbəri uşaqları təbrik edir, məzunlar minnətdarlıqlarını bildirirlər, hisslərini izhar edirlər, valideynlərin nümayəndəsi, müəllimlər danışır, ürəyi istəyən rəqs edir, şeir deyir, müəllimlərinə həsr etdiyi şarjlarını deyir. Son zəngi kvest kimi edən məktəblər var. Onlar “Son zəng”in əsas atributu olan balaca mexaniki zəngi haradasa gizlədirlər və məktəbin otaqlarında təlimatlar yazırlar. Tutaq ki, “fizika otağına gedin, filan təcrübəni yerinə yetirin”. Təcrübə yerinə yetirildisə növbəti təlimat açılır və s. Axırda gedib zəngi tapırlar və çalırlar.