Amerika Birləşmiş Ştatlarının (ABŞ) Bakıdakı səfirliyi Beynəlxalq Təhsil üzrə Amerika Şurası (EducationUSA) ilə birgə mayın 17-də “EducationUSA Məzun Sərgisi” keçirib. Sərgi Azərbaycanın orta məktəb və ali təhsil müəssisələrinin tələbələri, eləcə də onların valideynləri üçün mühüm informasiya platformasıdır.
“Tehsil365” xəbər verir ki, sərgidə 30-dan çox məzun və səfirliyin nümayəndələri iştirak ediblər. Ziyarətçilərə ABŞ-da ali təhsil imkanları və mövcud mübadilə proqramları haqqında məlumat verilib. Tədbirdə ABŞ səfirliyinin təqaüd və mübadilə proqramları ilə yanaşı, universitet məzunlarının təmsil etdiyi müxtəlif ixtisaslar, o cümlədən elm, incəsənət, biznes, ictimai siyasət və digər akademik sahələr barədə ətraflı təqdimatlar olub.
Tədbirin əsas məqsədi ABŞ-da bakalavr, magistratura və digər təhsil səviyyələri üzrə mövcud imkanlar barədə məlumatlılığı artırmaq, tələbə vizaları ilə bağlı prosesi izah etmək və bu sahədə maraqlı olan şəxslərə dəstək göstərməkdir. Sərgidə ABŞ səfirliyinin konsulluq nümayəndələri də iştirak ediblər və viza prosedurları barədə ziyarətçiləri məlumatlandırıblar.
Sərginin rəsmi açılışını ABŞ-ın ölkəmizdəki müvəqqəti işlər vəkili Hüqo Guevara edib. O bildirib ki, ABŞ-ın Bakıdakı səfirliyi Beynəlxalq Təhsil üzrə Amerika Şurası ilə birgə Birləşmiş Ştatlarda təhsil almağa maraq göstərən orta məktəb və universitet tələbələri, eləcə də onların valideynləri üçün “EducationUSA Məzun Sərgisi”nin keçirilməsini unikal fürsət kimi qiymətləndirir: “EducationUSA proqramı geniş miqyasda həyata keçirilir və bu, Azərbaycanda ABŞ-da təhsilə marağın artdığını göstərir. Tədbirin uğurla reallaşmasında mühüm rol oynayan “American Councils” təşkilatının əməkdaşları təşəkkürümüzü bildiririk, çünki onların fədakar əməyi bu təşəbbüsün uğurla həyata keçirilməsində həlledici olub. Səfirlik əməkdaşları və onların ailə üzvləri də sərgidə könüllü olaraq iştirak edərək öz universitetlərini təmsil edirlər. Ali təhsilə hazırlıq prosesi həm sevindirici, həm də müəyyən mənada gərgin ola bilər. Bu prosesin yaratdığı həyəcanı və çağırışları dərindən anlayıram. Həm yeni başlayanların, həm də artıq bu yolda uğur qazananların əzmini və nailiyyətlərini yüksək dəyərləndirirəm”.
