Mayın 19-da AMEA-nın akademik Ziya Bünyadov adına Şərqşünaslıq İnstitutunda “Cavad Heyət - Cənubi azərbaycanlıların mədəni-mənəvi varlığının təcəssümü kimi” mövzusunda elmi sessiya keçirilib. Tədbir görkəmli alim və ictimai xadim, doktor Cavad Heyətin 100 illiyinə həsr edilib.
Bu barədə “Tehsil365”ə Şərqşünaslıq İnstitutundan bildirilib.
Elmi sessiyanı Şərqşünaslıq İnstitutunun elmi işlər üzrə direktor müavini dosent Ruhəngiz Cümşüdlü açaraq Cavad Heyətin istər cərrahiyyə sahəsində, istərsə də “Varlıq” jurnalının redaktoru, ictimai xadim kimi azərbaycançılıq və türkçülüyün təbliği sahəsində mühüm xidmətlər göstərdiyini bildirib. R.Cümşüdlü Cənubi azərbaycanlıların mədəni-mənəvi varlığının təcəssümü olan Cavad Heyətin anadan olmasının 100 illiyi ərəfəsində onun yubileyini Şərqşünaslıq İnstitutunun bu görkəmli şəxsiyyətə həsr olunmuş elmi sessiya keçirməklə qeyd etdiyini bildirib.
Daha sonra elmi sessiyada məruzələr dinlənilib. Şərqşünaslıq İnstitutunun Cənubi Azərbaycan şöbəsinin müdiri dosent Səməd Bayramzadə “Cavad Heyət – xatirələrdə əbədi yaşayacaq şəxsiyyət” mövzusunda məruzə edib S.Bayramzadə Cavad Heyətin 25 min əməliyyat, o cümlədən açıq ürək əməliyyatları keçirməsini, 35 il müntəzəm şəkildə nəşr etdirdiyi “Varlıq” jurnalının Cənubi azərbaycanlıların milli şüurunun formalaşmasında mühüm rol oynadığını, Azərbaycan dili, ədəbiyyatı, tarixinə dair çoxsaylı kitabların, məqalələrin müəllifi olduğunu qeyd edib. O, Cavad Heyətin ensiklopedik məlumatlı, eyni zamanda, prinsipial, azadlığı və həqiqəti hər şeyin üstündə tutan, xalqını, Vətənini, dilini və mədəniyyətini çox sevən bir şəxsiyyət olduğunu vurğulayıb.
İnstitutun baş elmi işçisi professor Solmaz Rüstəmova-Tohidi “Cavad Heyət – böyük azərbaycanlı və vətəndaş” mövzusunda məruzə edib. S.Rüstəmova-Tohidi Cavad Heyətin elə təkcə “Varlıq” jurnalındakı fəaliyyətinin onun adının Azərbaycan xalqının tarixinə böyük hərflərlə düşməsinə yetərli olduğunu deyib. Məruzəçi bu böyük şəxsiyyətin Azərbaycan türklərinin milli şüurunun inkişafında, azərbaycançılığın təbliğində əvəzsiz xidmətləri olduğunu qeyd edib.
İnstitutun aparıcı elmi işçisi dosent Yeganə Hacıyeva “Azərbaycan dilinin görkəmli tədqiqatçısı Cavad Heyət” mövzusunda məruzə edib. Məruzəçi bildirib ki, Cavad Heyət ömrünü Azərbaycan xalqı, dili, mədəniyyəti ilə bağlı yüksəksəviyyəli nəzəri araşdırmaların aparılmasına, Azərbaycan dilinin elmi tarixi ilə bağlı əsərlərin yazılmasına sərf edib. Qeyd edilib ki, Cavad Heyət öz tədqiqatlarında türk dillərinin təsnifatı haqqında IX əsrdən bəri mövcud fikirlərin tənqidi icmalını və türk dillərinin morfoloji quruluşunun yığcam şərhini, Türkiyə və Azərbaycan türkcəsinin tarixi inkişaf yolları haqqında müfəssəl məlumat verib.
Sonda məruzələr ətrafında fikir mübadiləsi aparılıb, suallar cavablandırılıb.
