ADA Universitetinin İnkişaf və Diplomatiya İnstitutunun rüblük ingilisdilli nəşri olan “Bakı dialoqları” (“Baku Dialogues”) jurnalının yaz buraxılışı dərc edilib.
Universitetdən “Tehsil365”ə bildirilib ki, nəşrdə dövrümüzün aktual siyasi, iqtisadi və geosiyasi çağırışlarını araşdıran yerli və beynəlxalq ekspertlərin analitik məqalələri əksini tapıb.
Nəşrin ilk məqaləsi “Orta Dəhlizin gələcəyinin qurulması” başlığı altında təqdim edilir. Azərbaycan, ABŞ və Macarıstandan olan ekspertlər tərəfindən birgə qələmə alınmış bu məqalədə Trans-Xəzər İnkişaf Bankının təsis edilməsi ilə bağlı təklif ətraflı təhlil olunub. Məqalədə Orta Dəhlizi rəqabətli və dayanıqlı ticarət və nəqliyyat yoluna çevirmək məqsədilə nəzərdə tutulan regional maliyyə mexanizmləri izah edilib.
Digər əsas başlıq – “İki müasir təhlükə: terrorizm və ekstremizm” – beynəlxalq təhlükəsizlik və sabitliyə qarşı artan təhdidlərə diqqət çəkib. Məqalədə qeyri-dövlət aktorlarının artan təsiri və qlobal antiterror strategiyalarındakı yeni meyillər ön plana çəkilib.
Nəşrdə, həmçinin vətəndaşsızlıq problemi ilə bağlı məqalə yer alıb. Avropa və Mərkəzi Asiya kontekstində vətəndaşlığı olmayan əhali qruplarının qarşılaşdıqları çətinliklər və onların həlli üçün mümkün siyasi alətlər məqalədə təhlil olunub.
Jurnalın “Heç kimi arxada qoymamaq” devizi altında yer alan və BMT eksperti tərəfindən qələmə alınmış “İqlim dəyişikliyi, həssas qruplar və data əsaslı siyasi qərarvermə” məqalədə iqlim dəyişikliyinin həssas qruplara göstərdiyi qeyri-bərabər təsirdən bəhs olunub. Müəllif bu təsirlərin aradan qaldırılması üçün sübuta əsaslanan və məlumat yönümlü siyasi yanaşmaların zəruriliyini ön plana çəkib.
Jurnalda ADA Universitetinin rektoru, səfir Hafiz Paşayevin “Bir səfirin manifesti” kitabının təhlili yer alıb. İnkişaf və Diplomatiya İnstitutunun siyasi araşdırmalar, təhlil və nəşrlər üzrə direktoru Damjan Miskoviç kitab haqqında fikirlərini bölüşüb. O, müstəqil Azərbaycanın ABŞ-da ilk səfiri olmuş rektor Hafiz Paşayevin Azərbaycan–ABŞ münasibətlərinin əvvəlki və indiki vəziyyəti barədə fikirlərinin icmalını təqdim edib.
Nəşrin tam versiyasını “bakudialogues.ada.edu.az” saytından oxumaq və yükləmək olar.