Üsküdar Universiteti İletişim Fakültəsi Beynəlxalq Kommunikasiya Günləri (IFIG) bu il Azərbaycanda keçirilib. Üsküdar Universitetinin təşkilatçılığı ilə 12 ildir mütəmadi olaraq keçirilən Beynəlxalq Kommunikasiya Günləri bu il Azərbaycanda, Bakı Dövlət Universitetində baş tutub. “Rəqəmsal Çağda Media və Kommunikasiya Fəaliyyəti” adlı üzbəüz və onlayn simpozium Üsküdar Universitetinin İletişim Fakültəsi və Bakı Dövlət Universitetinin Jurnalistika fakültəsi ilə birgə 14-16 may tarixləri arasında keçirilib. Simpoziuma 300-dən çox məruzə təqdim olunub. Əksəriyyəti Türkiyə və Azərbaycandan olmaqla, müxtəlif ölkələrdən 150-dən çox alim Bakıda bir araya gəlib. Onlayn sessiyalarda isə 150-dən çox tədqiqatçı alim məruzə ilə çıxış edib. Bütün panellər interaktiv xarakter daşıyıb və çoxsaylı izləyici kütləsinin iştirakı ilə keçirilib. Simpoziumda rəqəmsal əsrin mediasına müxtəlif aspektlərdə toxunulub.
Qeyd edək ki, XII IFIG çərçivəsində Bakıda keçirilən simpoziumda rəqəmsallaşma və süni intellekt sahəsinə aid olan mövzular əsas diqqət mərkəzində olub. Simpoziumda təqdim olunan hesabatın əhəmiyyətli bir hissəsində medianın rəqəmsallaşmanın təsiri ilə necə dəyişdiyi yenidən qiymətləndirilib. Tədqiqatların əksəriyyəti süni intellekt mövzusuna həsr olunub ki, bu da onun media sektoruna əsaslı təsir göstərdiyini ortaya qoyur. Media sektorunda süni intellektin istifadəsinin bir sıra üstünlükləri olsa da, mənfi tərəfləri də var. Lakin bu üstünlükləri artırmaq və mənfi cəhətləri minimuma endirmək mümkündür. Media mütəxəssisləri dəyişən və inkişaf edən şərtlərə cavab vermək üçün müvafiq təlimlər keçməlidirlər.
Bu kontekstdə simpoziumda təqdim olunan bəzi məruzələr gələcəkdə media mütəxəssislərinin necə hazırlanmalı olduğuna diqqət çəkib. Xüsusilə, media və kommunikasiya sahəsində süni intellektdən istifadənin müsbət və mənfi tərəfləri həm tədqiqatçılar, həm də media mütəxəssisləri tərəfindən ətraflı şəkildə müzakirə olunub. Media mütəxəssisləri süni intellektin sektora sürətlə daxil olduğuna və yaxın gələcəkdə media sektorunun müxtəlif seqmentlərinin süni intellekt tərəfindən idarə olunacağına diqqət çəkiblər. Bu baxımdan, gələcəyin jurnalistlərinin hansı təhsilə və hansı keyfiyyətlərə sahib olması məsələsi də müzakirə edilib.
Media və kommunikasiya sahəsində tədris aparan müəllimlər bildiriblər ki, jurnalistika fakültəsində tədris, mütəxəssislərin qeyd etdiyi kimi, müasir şərtlərə uyğun olaraq dəyişdirilməlidir. Bu çərçivədə jurnalistika fakültələrinin fəaliyyət göstərdiyi universitetlərdə tətbiq olunan kurikulumların sektorun ehtiyaclarına və texnoloji inkişaflara uyğun şəkildə təcili olaraq yenilənməsinin zəruriliyi vurğulanıb. Türkiyədə akkreditasiya prosesinin təhsilin inkişaf edən şərtlərə uyğun transformasiyasına verdiyi töhfələr qeyd olunarkən, Azərbaycan universitetlərinin də bu prosesə cəlb olunmasının vacibliyi diqqətə çatdırılıb.
Simpoziumda müxtəlif ölkələrdən olan tədqiqatçıların qarşılıqlı əlaqəsi də xüsusi əhəmiyyət daşıyıb. Onlar öz ölkələrində jurnalistika və kommunikasiya təhsili ilə bağlı nümunələr təqdim edərək, tədris tələbləri üzərində dayanıb müzakirələr aparıblar. Xüsusilə, Türkiyə və Azərbaycandan olan ünsiyyət tədqiqatçılarının görüşü və paylaşımları simpoziumun ən mühüm nəticələrindən biri hesab olunur. Hər iki ölkənin tədqiqatçıları jurnalistika təhsili ilə bağlı təcrübələrini bölüşərək gələcəkdə birgə həyata keçirilə biləcək layihələrə diqqət yetiriblər. İki ölkə arasında bəzi fərqlər olsa da, ortaq cəhətlərin daha çox olduğu vurğulanıb. Bu baxımdan, jurnalistika təhsili və kommunikasiya elmlərinin inkişafı istiqamətində əməkdaşlıq böyük əhəmiyyət kəsb edir.
Rəqəmsal Əsrdə Media və Kommunikasiya Araşdırmaları Simpoziumuna Azərbaycan mediası da böyük maraq göstərib. Simpoziumun açılış mərasimində yüksək səviyyəli media nümayəndələri iştirak ediblər. Üç gün davam edən sessiyalara jurnalistlərin marağı diqqətçəkici olub. Onlar həm təqdimatlar ediblər, həm də tədqiqatçı alimlərlə müsahibələr aparıblar. Medianın bu dərəcədə intensiv marağı simpoziumun Azərbaycanda keçirilməsinin nə qədər vacib olduğunu bir daha sübut edir. Rəqəmsal texnologiyalarla mediada əhəmiyyətli transformasiyalar baş verib. İnkişaf edən texnologiyalara uyğun olaraq dəyişmək və yenilənmək vacibdir. Sabaha hazırlıqsız yaxalanmamaq üçün bu gündən tədbir görmək lazımdır. Bu səbəbdən, indini düzgün təhlil etmək, onu anlamaq, haqqında müzakirələr aparmaq və birlikdə gələcəyə ən düzgün şəkildə rəhbərlik etmək olduqca vacibdir.
XII Beynəlxalq Kommunikasiya Günləri / Rəqəmsal Çağda Media və Kommunikasiya Fəaliyyəti Simpoziumu da bu günün mediasını anlamaq və gələcəyin mediasını gücləndirmək baxımından mühüm akademik ünsiyyət platforması hesab oluna bilər.
Professor Nazife Güngör, Üsküdar Ünivetsitesinin rektoru