Çin Xalq Respublikasının Azərbaycanda yeni təyin olunmuş səfiri xanım Lu Mey Bakı Dövlət Universitetində (BDU) olub.
BDU-dan “Tehsil365”ə bildirilib ki, rektor Elçin Babayev ilə keçirilən görüşdə səfirə universitetin tarixi, beynəlxalq əlaqələri, xüsusilə də Çinin ali təhsil və elmi-tədqiqat qurumları ilə əməkdaşlığı haqqında məlumat verilib. Rektor iki ölkə arasında dostluq münasibətlərinin elm və təhsil sahəsində də uğurla inkişaf etdiyini vurğulayıb, BDU-da fəaliyyət göstərən Konfutsi İnstitutunun bu əməkdaşlıqda xüsusi rol oynadığını qeyd edib.
Tərəflər Çin universitetləri ilə tələbə və müəllim mübadiləsi proqramlarının genişləndirilməsi, birgə elmi layihələrin həyata keçirilməsi, Çin dili və mədəniyyətinin tədrisi sahəsində əməkdaşlığın dərinləşdirilməsi perspektivləri ətrafında müzakirə aparıblar. Rektor Elçin Babayev Çinin nüfuzlu universitetləri ilə daha sıx əlaqələrin qurulmasında maraqlı olduqlarını bildirib.
Səfir Lu Mey Azərbaycan ilə Çin arasında dostluq və strateji tərəfdaşlıq münasibətlərinin inkişafına təhsil və elm sahəsində əməkdaşlığın mühüm töhfə verdiyini qeyd edib. O, Çin tərəfinin də bu istiqamətdə əməkdaşlığa dəstək verməyə hazır olduğunu vurğulayıb.
Görüş zamanı Azərbaycan Respublikasının Prezidenti İlham Əliyevin Çinə dövlət səfərinə də toxunulub. Qeyd edilib ki, Prezident İlham Əliyevin Çin Xalq Respublikasının Sədri Si Cinpin (Xi Jinping) ilə keçirdiyi yüksəksəviyyəli görüşlər iki ölkə arasında strateji tərəfdaşlığın daha da möhkəmlənməsinə xidmət edib. Bu səfər çərçivəsində elm, təhsil və mədəniyyət sahəsində əməkdaşlığın dərinləşdirilməsi prioritet istiqamətlərdən biri kimi müəyyən edilib. Bu kontekstdə ali təhsil müəssisələrinin əməkdaşlığı xüsusi əhəmiyyət kəsb edir.
