AMEA Folklor İnstitutunun Elmi şurasının növbəti iclası keçirilib.
İnstitutdan “Tehsil365”ə bildirilib ki, iclasda yeni elmi istiqamətlər və yüksəkixtisaslı kadr hazırlığının keyfiyyətinin yüksəldilməsi məsələləri müzakirə olunub.
Folklor İnstitutunun direktoru dosent Hikmət Quliyev qeyd edib ki, Nazirlər Kabinetinin 2025-ci il 2 may tarixli Sərəncamı ilə təsdiq olunmuş “Azərbaycan Respublikasının ali təhsil müəssisələrinin, elmi müəssisə və təşkilatlarının 2025-ci il üçün doktorant hazırlığı üzrə qəbul planına” və AMEA Rəyasət Heyətinin 2025-ci il 8 may tarixli qərarına əsasən, fəlsəfə doktoru hazırlığı üzrə doktoranturaya qəbul elan edilib. Qəbul planına müvafiq olaraq, Folklor İnstitutunda folklorşünaslıq və Azərbaycan ədəbiyyatı ixtisasları üzrə ümumilikdə 5 yerin ayrıldığını qeyd edən H.Quliyev bununla əlaqədar institutun Təhsil şöbəsinə müraciətlər edildiyini diqqətə çatdırıb.
O qeyd edib ki, hazırda Folklor İnstitutunda ümumilikdə 20 elmlər doktoru və 10 fəlsəfə doktoru hazırlığı üzrə doktorant və dissertantlar təhsil alır. “Hesab edirik ki, doktorant və dissertantların dissertasiya mövzularının aktuallığı, problemlərin qoyuluşu, beynəlxalq təcrübə və çağırışlara uyğunluğu, araşdırmaların nüfuzlu jurnallarda dərc edilməsi kimi parametrlər üzrə attestasiya və monitorinqin aparılmasına ehtiyac var. Bununla əlaqədar xüsusi formalar hazırlanıb və yaxın günlərdə doktorant və dissertantlara təqdim ediləcək”, – deyə o əlavə edib.
H.Quliyev Özbəkistanla folklorşünaslıq istiqamətində əlaqələrin genişləndirilməsindən danışaraq bildirib ki, Folklor İnstitutu bu ilin aprel ayında Özbəkistanın Xivə şəhərində UNESCO və ICESCO-nun himayəsi ilə keçirilmiş İkinci Türk Dünyası Mədəniyyət Forumunda uğurla təmsil olunub. Səfər çərçivəsində AMEA Folklor İnstitutu ilə Daşkənddəki Yunus Rəcəbi adına Özbək Milli Musiqi Sənəti İnstitutu və Urgənc Dövlət Universiteti arasında əməkdaşlığa dair memorandumlar imzalanıb. Alim Özbəkistanın elm və təhsil qurumları ilə birgə tədqiqatların aparılması, kadrların yetişdirilməsi, yeni layihələrin hazırlanması və icrası, eləcə də ortaq elmi nəşrlərin həyata keçirilməsinin əhəmiyyətini vurğulayıb.
Sonra AMEA Rəyasət Heyətinin 2025-ci il 14 aprel tarixli qərarı ilə təsdiq olunmuş Folklor İnstitutunun yeni strukturundan irəli gələn elmi və elmi-təşkilati məsələlərin həyata keçirilməsi məsələsi müzakirə olunub. Qeyd olunub ki, Rəyasət Heyətinin müvafiq qərarı ilə Folklor İnstitutunun strukturunda daxili imkanlar və mövcud ştat vahidləri hesabına İctimaiyyətlə əlaqələr şöbəsi yaradılıb.
Eyni zamanda, Elmi şurada ölkəmizdə həyata keçirilən dövlət siyasətinə, müasir dünyanın çağırışlarına və son dövrlərdə Azərbaycan Milli Elmlər Akademiyasında aparılan islahatlara müvafiq olaraq, bir sıra yeni elmi istiqamətlər üzrə şöbələrin yaradılması barədə vəsatət qaldırılması qərara alınıb.
Daha sonra elmi katib Elçin Abbasov Folklor İnstitutunun Elmi şurasının tərkibində dəyişiklik edilməsi və 2025-ci il üçün institutun nəşrlər planının hazırlanması barədə məlumat verib.
Türkiyədə ezamiyyətdə olmuş Müasir folklor şöbəsinin müdiri Füzuli Bayat çıxış edərək Trabzon Universitetinin İnsan və cəmiyyət elmləri fakültəsinin təşkilatçılığı ilə keçirilən “Yavuz Sultan Səlim: elm, düşüncə və sənət” mövzusunda beynəlxalq simpoziumda iştirakı barədə təəssüratlarını bölüşüb.
Türk xalqları folkloru şöbəsinin aparıcı elmi işçisi Səkinə Qaybalıyeva Folklor İnstitutunun təşkilatçılığı ilə keçiriləcək və “Konstitusiya və Suverenlik İli”nə həsr olunacaq “Milli dövlətçilik və folklor” mövzusunda respublika elmi konfransının təşkili barədə məlumat verib.
