Azərbaycan Respublikasında 2025-ci ilin “Konstitusiya və Suverenlik İli” elan edilməsi, eləcə də Elm və Təhsil Nazirliyinin akademik Həsən Əliyev adına Coğrafiya İnstitutunun 80 illik yubileyi ilə əlaqədar bu elmi müəssisənin bir qrup əməkdaşı Cəlilabad və Lənkəran rayonlarına səfər edib və regional tədbirlərdə iştirak edib.
Bu barədə “Tehsil365”ə institutdan məlumat verilib.
Tədbirlərdə çıxış edən Coğrafiya İnstitutunun baş direktoru vəzifəsini icra edən coğrafiya üzrə fəlsəfə doktoru dosent Zaur İmrani elm və təhsil arasında inteqrasiyanın növləri, onların perspektivləri, doktorantura təhsil səviyyəsinə gənclərin cəlb olunması və s. məsələlərə aydınlıq gətirib.
Azərbaycan Dövlət Pedaqoji Universitetinin Cəlilabad filialında keçirilən tədbir “Regionlarda elm və təhsilin keyfiyyətinin yaxşılaşdırılması” mövzusunda həsr edilib. Həmin tədbirdə aqrar üzrə elmlər doktoru Çingiz Gülalıyev “Cəlilabad rayonunun torpaq resursu və ondan istifadə imkanları”, dosent Səidə Zeynalova “Cənub bölgəsinin regional planlaşdırılması kontekstində Cəlilabad və Lənkəran rayonlarının geoekoloji potensialı”, dosent İsmayıl Quluyev “Qlobal səhralaşma fonunda Cəlilabad rayonunun torpaq örtüyünün müasir vəziyyəti və qiymətləndirilməsi”, dosent Etibar Bədəlov Lənkəran-Astara iqtisadi rayonunda şəhər əhalisinin demoqrafik inkişaf xüsusiyyətləri”, coğrafiya üzrə fəlsəfə doktoru Natiq Babayev “Şərqi Zəngəzur oronimlərinin nominativ təsnifatı”, Cəlilabad filialının baş müəllimi Ələsgər Mirzəzadə “Cəlilabad qədim abidələr yurdudur” mövzularında məruzələr ediblər.
Lənkəran Dövlət Universitetində “Regionlarda elm və təhsilin inteqrasiyası” adlı tədbirdə bu universitetin rektoru professor Natiq İbrahimovla görüş keçirilib. Coğrafiya İnstitutunun əməkdaşlarından dosent Müseyib Yunusov “Respublikamızda elm və təsilin inteqrasiya problemləri”, dosent Solmaz Rzayeva “Lənkəran-Astara iqtisadi rayonunda tibbi-coğrafi baxımdan əhalinin sağlamlığına təsir edən amillərin tədqiqi”, coğrafiya üzrə fəlsəfə doktoru Nicat İmamverdiyev “Azərbaycanda yaşıl enerji transformasiyası: mövcud vəziyyət və inkişaf perspektivləri”, kiçik elmi işçi Nazim Gəraylı “Süni intellekt və GİS: Yeni inteqrasiya imkanları”, dosent Afaq Qasımova “Dahi şəxsiyyət Heydər Əliyev Azərbaycan Respublikası Konstitusiyasının banisidir”, dosent Sənan Əzizov “Lənkəran-Astara iqtisadi rayonunda mövcud demoqrafik vəziyyətin qiymətləndirilməsi”, dosent Qorxmaz Ağayev “Lənkəran təbii vilayətində bərpaolunan enerji mənbələrindən istifadə imkanları və gələcək perspektivləri” (geotermal mənbələr nümunəsində) mövzularında məruzələr ediblər.
Tədbirin sonunda qarşılıqlı müzakirələr aparılıb, regional elm və təhsil ilə bağlı suallar cavablandırılıb.
