Mayın 22-də Azərbaycan Milli Elmlər Akademiyasında (AMEA) Ulu Öndər Heydər Əliyevin anadan olmasının 102-ci ildönümünə və AMEA-nın 80 illiyinə həsr edilmiş institutlararası minifutbol turnirinin bağlanış mərasimi keçirilib.
Akademiyadan “Tehsil365”ə bildirilib ki, turnir AMEA-nın Rəyasət Heyəti və Azərbaycan Həmkarlar İttifaqları Konfederasiyasının dəstəyi, AMEA-nın Azad Həmkarlar İttifaqı (AHİ), AMEA-nın Gənc Alim və Mütəxəssislər Şurası və ATİAHİ Elmi Təşkilatların Həmkarlar İttifaqı Komitəsinin təşkilatçılığı ilə baş tutub.
Turnir bu il ilk dəfə fərqli formatda təşkil olunub; həm Azərbaycan Milli Elmlər Akademiyasının, həm də Elm və Təhsil Nazirliyinin tabeliyində olan elmi müəssisələrin ayrıca çempionatı keçirilib, yekunda hər çempionatın qalibi olan komandalar superkubok uğrunda qarşılaşıblar. Belə ki, AMEA üzrə çempion final qarşılaşmasında Nizami Gəncəvi adına Ədəbiyyat, A.A.Bakıxanov adına Tarix və Etnologiya, Hüquq və İnsan Haqları institutlarının birləşmiş komandasını məğlub edən AMEA nəzdində Respublika Seysmoloji Xidmət Mərkəzinin komandası olub.
III yer uğrunda keçirilən görüşdə isə AMEA Rəyasət Heyəti aparatının və “Elm” nəşriyyatının birləşmiş komandası Memarlıq və İncəsənət və Fəlsəfə və Sosiologiya institutlarının birləşmiş komandasını məğlub edərək bürünc medalın sahibi olub.
Elm və Təhsil Nazirliyinin tabeliyində olan elmi müəssisələr üzrə çempion isə finalda İnformasiya Texnologiyaları İnstitutunun komandasını məğlub edən Geologiya və Geofizika İnstitutunun komandası olub. III yeri isə İqtisadiyyat İnstitutunun komandası tutub.
Superkubok uğrunda keçirilən qarşılaşmada AMEA-nı Respublika Seysmoloji Xidmət Mərkəzi, Elm və Təhsil Nazirliyinin tabeliyində olan elmi müəssisələri isə Geologiya və Geofizika İnstitutunun komandası təmsil edib. Görüşün əsas vaxtı 3:3 hesabı ilə başa çatıb və penalti zərbələrində AMEA nəzdində Respublika Seysmoloji Xidmət Mərkəzinin komandası üstün olaraq superkubokun sahibi olublar.
Akademiya şəhərciyində yerləşən stadionda baş tutan oyunlardan sonra turnirin mükafatlandırma mərasimi olub.
Tədbirdə AMEA-nın prezidenti akademik İsa Həbibbəyli qeyd edib ki, Ümummilli Lider Heydər Əliyev ölkəmizdə bütün sahələrə olduğu kimi, idmanın da inkişafına xüsusi diqqət yetirib. Ulu Öndərin gənclər və idman siyasətinin Prezident İlham Əliyev tərəfindən uğurla davam etdirildiyini deyən AMEA rəhbəri son illərdə Azərbaycanın dünya səviyyəli yarışmalara uğurla ev sahibliyi etdiyini, Azərbaycanın idman ölkəsi kimi tanındığını, idmançılarımızın dünya və Avropa yarışmalarında, eləcə də Olimpiya oyunlarında xalqımızı ləyaqətlə təmsil etdiklərini bildirib. Vurğulayıb ki, dövlətimizin idman siyasəti xalqımızın hərtərəfli inkişaf etdirilməsi siyasətinin üzvi tərkib hissəsidir.
Akademiyada da dövlətimizin siyasətinə uyğun olaraq, hər il ənənəvi futbol çempionatının keçirildiyini bildirən akademik İsa Həbibbəyli builki turnirin ilk dəfə fərqli formatda baş tutduğunu diqqətə çatdırıb.
AMEA rəhbəri çıxışının sonunda qeyd edib ki, belə tədbirlər yeni nəsillərin Heydər Əliyev, azərbaycançılıq və dövlətçilik ruhunda tərbiyəsində böyük əhəmiyyətə malikdir və bu istiqamətdə əməli fəaliyyət bundan sonra da davam etdiriləcək.
AHİK sədrinin müavini Hikmət Osmanov isə çıxışında ölkəmizdə Ulu Öndər Heydər Əliyevin anadan olmasının 102-ci ildönümünə həsr edilmiş silsilə tədbirlər keçirildiyini və Azərbaycan Həmkarlar İttifaqları Konfederasiyasının bu tədbirlərdə yaxından iştirak etdiyini söyləyib.
Tədbirdə, həmçinin YAP Yasamal Rayon Təşkilatının sədri Bəxtiyar Nəbiyev, Bakı şəhər Gənclər və İdman İdarəsinin Yasamal rayonu üzrə Gənclər və idman sektorunun müdiri İlham Səfərov, AMEA AHİ-nin sədri siyasi elmlər üzrə fəlsəfə doktoru Sənan Həsənov, ATİAHİ Elmi Təşkilatların Həmkarlar İttifaqı Komitəsinin sədri hüquq elmləri doktoru Habil Qurbanov çıxış ediblər. Çıxışlarda çempionatda iştirakçıların sayı və turnirə göstərilən marağın yüksək olduğu vurğulanıb.
Çıxışlardan sonra akademik İsa Həbibbəyli Respublika Seysmoloji Xidmət Mərkəzinin futbol komandasının kapitanı Azər İsgəndərova çempionatın kubokunu və medallarını təqdim edib. Həmçinin ikinci və üçüncü yerlərin sahiblərinə sertifikatlar, medal və pul mükafatları təqdim olunub.
Sonda minifutbol turnirinin bağlanış mərasiminin iştirakçıları AMEA-nın Nadir ağaclar parkına baxış keçiriblər.
