"Bu həftəsonu keçiriləcək II və III ixtisas qrupları üzrə qəbul imtahanlarında 54 246, iyunun 1-də keçiriləcək I və IV ixtisas qrupları üzrə imtahanlarda isə 37 692 abituriyentin iştirakı nəzərdə tutulur".
“Tehsil365” xəbər verir ki, bu sözləri Dövlət İmtahan Mərkəzinin (DİM) İdarə Heyətinin sədri Məleykə Abbaszadə media nümayəndələri üçün təşkil olunan konfransda bildirib.
Sədrin sözlərinə görə, bu mərhələdə də ötən illə müqayisədə təxminən 7 min nəfər çox imtahan iştirakçısı var.
İmtahanların keçirildiyi şəhər və rayonlara toxunan Məleykə Abbaszadə bildirib ki, onların sayının daim artırılmasına diqqət yetirilir:
“2012-ci ildən etibarən buraxılış imtahanları bütün şəhər və rayonlarda təşkil olunur. Qəbul imtahanları isə əvvəlcə yalnız Bakı və Naxçıvanda keçirilirdi. Daha sonra DİM-in regional bölmələrinin yerləşdiyi digər böyük şəhərlərdə təşkil olunmağa başlandı. Hazırda isə qəbul imtahanları ölkənin 24 şəhər və rayonunda keçirilir. Sevindirici haldır ki, Dövlət İmtahan Mərkəzi artıq Xankəndi şəhərində də qəbul imtahanları keçirəcək. Bu, işğaldan azad edilmiş bölgələrdə təşkil olunan ilk qəbul imtahanıdır. Artıq həmin bölgələrdə yaşayan abituriyentlər öz doğma torpaqlarında imtahan verirlər,” - deyə sədr vurğulayıb.