Bakı Slavyan Universitetinin (BSU) rektoru Anar Nağıyevin təşəbbüsü ilə Naxçıvan şəhər Heydər Əliyev adına tam orta məktəbin IX sinif şagirdi Fərid Nəzərli universitetdə keçirilən elmi seminarda iştirak edib.
“Tehsil365” xəbər verir ki, bu təşəbbüs martın 5-də BSU-da “Konstitusiya və Suverenlik İli” çərçivəsində təşkil olunan “Yeni dövrün Azərbaycanı” mövzusunda şagirdlərlə keçirilmiş görüş zamanı formalaşıb. Həmin tədbirdə çıxış edən Fərid türkoloji tədqiqatlara böyük maraq göstərdiyini bildirib və bu sahədə mütəxəssislərlə elmi müzakirələr aparmaq istədiyini vurğulayıb. Onun bu arzusu universitet rəhbərliyi tərəfindən yüksək qiymətləndirilib və Fərid BSU-ya dəvət olunub.
Mayın 26-da Fəridin elmi maraqlarını dəstəkləmək məqsədilə universitetdə “Qədim türk əlifbası və ədəbi dili” mövzusunda elmi seminar keçirilib. Seminarda gənc tədqiqatçı qismində çıxış edən Fərid qədim türk dili və əlifbası ilə bağlı mütəxəssislərə maraqlı suallar ünvanlayaraq tədbirin elmi müzakirələrinə töhfə verib. Onun fəallığı və təşəbbüskarlığı seminar iştirakçıları tərəfindən rəğbətlə qarşılanıb.
Qeyd edək ki, Fərid həmçinin BSU-nun “Konstitusiya və Suverenlik İli” Tədbirlər Planı çərçivəsində keçirilən “Yeni dövrün gəncliyi” mövzusunda I Respublika tələbə-şagird elmi-praktik konfransında da fəal iştirak edib və panel müzakirələrində çıxış edən iştirakçılardan biri olub.
