Təəssüf ki, gündəmin əsas mövzularından biri yenə uşaq bağçalarında baş verən şiddət hadisəsidir. Belə ki, Lənkəranda yerləşən "Kaspi Kids" uşaq bağçasında uşaqlara qarşı göstərilən fiziki zorakılıqla bağlı görüntülər sosial şəbəkələrdə yayılıb. Təbii ki, bu, ilk belə hadisə deyil. Zaman-zaman bağçalarda uşaqların şiddətə məruz qalması ilə bağlı xəbərlərə rast gəlirik.
Bəs, uşaq bağçalarında uşaqlara qarşı fiziki və psixoloji şiddətə görə hansı hüquqi məsuliyyətlər nəzərdə tutulur?
Mövzu ilə bağlı “Tehsil365”-ə açıqlama verən vəkil Mehman Muradlı bildirib ki, bu məsələyə cəmiyyətin münasibəti birmənalı şəkildə mənfidir:
“Qanunvericiliyimizdə "şiddət" sözü yer almır, onun əvəzinə "işgəncə" termini istifadə olunur. Bu isə həm psixoloji, həm də fiziki zorakılığa aid edilə bilər və hər iki halda qəti şəkildə pislənilməlidir. Məsələnin digər tərəfi isə odur ki, konkret olaraq bu əməlləri törədən şəxs mütləq cəzalandırılmalıdır. Eyni zamanda, burada uşağa dəymiş zərərin qiymətləndirilməsi məsələsi var.
İşgəncə nəticəsində uşaqda travma yarana bilər və ya artıq yaranıb. Bu cür halların qarşısını almaq üçün bağça müəllimlərinin psixoloji durumları mütəmadi şəkildə yoxlanmalıdır. Çünki bəzən müəllimlər şəxsi problemlərini, evdə yaşadıqları stressi işə gətirərək onu uşaqlara yönəldirlər. Psixoloji və ya peşə baxımından uyğun olmayan şəxslərin bağçalarda işləməsi bu kimi fəsadlara səbəb olur. Məncə, bu məsələyə Ailə, Qadın və Uşaq Problemləri üzrə Dövlət Komitəsi ciddi nəzarət etməlidir.
Qanunvericiliyə əsasən, bu tip hadisələrdə cinayət işi başlanmalıdır. Bağçaya qarşı tədbirlər görülməlidir. Belə hallar təkcə Lənkəranda deyil, paytaxt Bakıda da yaşanıb".