Xəbər verdiyimiz kimi, 28–29 may 2025-ci il tarixlərində Dubay şəhərində yerləşən “Microsoft” İnnovasiya Mərkəzində Elm və Təhsil Nazirliyinin nümayəndə heyəti ilə “Microsoft”un regional komandası arasında süni intellekt və təhsil sahəsində əməkdaşlıq imkanlarına dair görüşlər keçirilib. Görüşlər zamanı süni intellekt texnologiyalarının təhsildə tətbiqi, məlumatların idarə olunması və təhsilə uyğunlaşdırılmış böyük dil modellərinin (LLM for Education) inkişafı mövzularında ətraflı fikir mübadiləsi aparılıb.
“Tehsil365” xəbər verir ki, Azərbaycan İnternet Forumunun prezidenti Osman Gündüz süni intellektin təhsil sahəsinə inteqrasiya edilməsi məsələsinə münasibət bildirib.
Ekspert qeyd edib ki, görünür ki, Azərbaycan süni intellekt sahəsində təhsil üçün uyğunlaşdırılmış ilk böyük dil modelini – EduAzGPT-ni formalaşdırmaq niyyətindədir.
"Ümumiyyətlə son zamanlar müşahidə olunur ki, inkişaf etmiş ölkələr süni intellekti müxtəlif sahələrdə, o cümlədən də təhsil sahəsində tətbiq etməyə ciddi önəm verirlər.
Məsələn:
Sinqapur – EduGPT ilə siniflərə fərdi AI tədrisi gətirir.
ABŞ – Khan Academy GPT ilə şagirdlərə AI müəllim təqdim edir.
Çin və Koreya məktəblərində də AI müəllim köməkçiləri istifadə olunur və s.
Azərbaycanın da bu istiqamətdə işlərə başlaması təqdirəlayiqdir.
EduAzGPT nədir?
EduAzGPT – Azərbaycan təhsil sisteminə və Azərbaycan dilinə uyğunlaşdırılmış süni intellekt modelidir.
Bu model:
- Şagirdlərə məhz fərdi öyrənmə təcrübəsi təqdim edə biləcək;
- Müəllimlərə dərs planı, qiymətləndirmə və rəqəmsal köməkçi funksiyaları verəcək;
- Təhsil idarəçilərinə məlumat əsaslı qərarlar üçün dəstək göstərəcək;
- Azərbaycan dilində bilik bazası formalaşdıracaq və s.
Düşünürəm ki, EduAzGPT-nin yaradılması Azərbaycanın təhsil sistemi üçün ciddi irəliləyiş ola bilərdi.
Bu model müəllim və şagirdlərə süni intellekt əsaslı fərdi yanaşmaya dəstək verəcək, eyni zamanda Azərbaycan dili üçün ilk geniş bilik bazasının təməlini qoyacaq.
Əgər EduAzGPT kimi bir model xarici dildən və ya xarici platformalardan asılı olmadan, Azərbaycanın özündə, öz dilində və öz məlumatları ilə işləyirsə bu , həm rəqəmsal suverenlik, həm də milli dilin AI dövründə yaşaması baxımından da strateji addımdır.
Yeri gəlmişkən, bu görüşlərdə diqqət çəkən bir məqam da var. “Microsoft” bir neçə il öncə Azərbaycandakı ofisini bağlasa da, Dubayda keçirilən son görüşlər göstərdi ki, əməkdaşlıq ruhu və strateji təmaslar hələ də yaşayır", - deyə Osman Gündüz yazıb.