Azərbaycan Dövlət İqtisad Universitetinin (UNEC) nəzdində Sosial-İqtisadi Kollecdə “Məzun günü” keçirilib.
Bu barədə “Tehsil365”ə kollecdən məlumat verilib.
Tədbiri açan Sosial-İqtisadi Kollecin direktoru Şəhriyar Laçınov bu il 27 qrupdan 528 tələbənin məzun olduğunu bildirib. Direktor onları qarşıda yeni sınaqların gözlədiyini, şanlı tariximizin qızıl hərflərlə yazıldığı bir dövrdə məzun olduqlarını vurğulayıb.
Sabunçu Gənclər evinin direktoru Kamil Yaqubov çıxışında Ümummilli Lider Heydər Əliyev tərəfindən əsası qoyulmuş, Prezident İlham Əliyev tərəfindən uğurla davam etdirilən dövlət gənclər siyasətinin əhəmiyyətindən danışaraq Sosial-İqtisadi Kollecin məzunlarının peşəkar mütəxəssis olacağına, cəmiyyətimizə fayda verəcəyinə əmin olduğunu qeyd edib.
Azərbaycan Dövlət Neft və Sənaye Universitetinin nəzdində Bakı Neft-Energetika Kollecinin direktoru Ata Babayev məzunlara dövlətimizin müstəqilliyini, xalqımıza məxsus nəcib dəyərləri qorumağı, ölkəmizin daha da inkişaf etməsi və güclənməsi üçün əzmlə, ləyaqətlə, fədakarlıqla çalışmağı tövsiyə edib.
Emal Sənayesi üzrə Bakı Dövlət Peşə Təhsil Mərkəzinin direktor əvəzi Əlağa Kərimov çıxışında vurğulayıb ki, Müzəffər Ali Baş Komandan İlham Əliyevin rəhbərliyi ilə qəhrəman Ordumuzun işğaldan azad etdiyi torpaqlarımızda həyata keçirilən quruculuq işlərinə töhfə vermək gənclərin əsas missiyasıdır.
Məzunların adından çıxış edən Ruslan Bayramov ötən illər ərzində onların üzərində böyük əməyi olan müəllimlərinə səmimi hisslərini çatdırıb, dərin təşəkkürünü bildirib. R.Bayramov məzunların ölkəmizə layiqli bir vətəndaş kimi xidmət edəcəyini, onlara göstərilən etimadı doğruldacaqlarını ifadə edib.
Kollecin sosial və humanitar məsələlər üzrə direktor müavini Zaur Vəliyev çıxışında məzunların qazandıqları bilik və bacarıqların yalnız şəxsi karyeralarında deyil, həm də cəmiyyətin rifahında mühüm rol oynayacağına əminliyini bildirib.
Tədbirdə təhsildə göstərdikləri yüksək nəticələrə və kollecin ictimai işlərində fəal iştiraka görə bir qrup məzuna təşəkkürnamə təqdim olunub.
Rəsmi hissədən sonra məzun tələbələrin hazırladığı bədii proqram təqdim olunub.
