"Microsoft" artıq özünün "Edge" brauzerini Avropadakı istifadəçilərinə aktiv şəkildə təklif edə bilməyəcək.
“Tehsil365” xəbər verir ki, bu barədə "Windows Central" nəşri məlumat verib.
Ekspertlərin fikrincə, bu addım Avropa İttifaqının Rəqəmsal Bazarlar Aktının (DMA) tələblərinə uyğun olaraq atılıb. Artıq Avropada "Windows 10" və "Windows 11" əməliyyat sistemlərinin istifadəçiləri "Edge" brauzerini standart brauzer kimi təyin etməyi təklif edən ismarıcları görməyəcəklər.
"Microsoft" nümayəndələri bildiriblər ki, "Edge" brauzerini yalnız istifadəçi özü işə saldıqda, bu proqramı əsas brauzer kimi qurmağı təklif edən "pop-up" pəncərəsi görünəcək.
Bundan əlavə, materialda qeyd edilir ki, istifadəçi hansısa üçüncü tərəf brauzerini əsas brauzer kimi seçdikdə, artıq bütün linklər yalnız həmin brauzerdə açılacaq. Keçmişdə bir çox istifadəçi müəyyən "Windows" sistem keçidlərinin yalnız "Edge"də açılmasından narazı qalırdı.