Naxçıvan Müəllimlər İnstitutunda gənc müəllim kadrların peşəkar inkişafına dəstək məqsədilə “Süni intellekt və yeni təlim texnologiyalarının tətbiqi ilə zənginləşdirilmiş müasir dərs” mövzusunda qısamüddətli təlim təşkil olunub.
“Tehsil365” xəbər verir ki, təlim Azərbaycan Dövlət Pedaqoji Universitetinin əməkdaşı, İbtidai təhsil fakültəsinin dekan müavini, Ümumi pedaqogika kafedrasının müəllimi Sevinc Eylazovanın təqdimatında keçirilib.
Tədbiri institutun rektoru vəzifəsini icra edən Elşən Məmmədov açaraq iştirakçıları və qonağı salamlayıb, təlimin əhəmiyyətindən danışıb. O, müəllimlərin və gələcək müəllim olan tələbələrin müasir pedaqoji trendlərə uyğun inkişaf etməsinin önəmini vurğulayıb.
Təlim interaktiv formatda keçib, iştirakçılar süni intellektin tədrisdə tətbiqi, rəqəmsal alətlərin istifadəsi və yeni təlim texnologiyalarının imkanları barədə praktiki bilik və bacarıqlarla tanış olub, özlərinin istifadə etdiyi platformalar haqqında müzakirələr aparıblar.
Sonra elm və innovasiya məsələləri üzrə prorektor dosent Qurban Qurbanlı təlim haqqında öz fikirlərini bölüşüb, təlimçi Sevinc Eylazovaya interaktiv təlim üçün təşəkkürünü bildirib.
Sonda təlimdə fəal iştirak edən müəllimlərə rəhbərlik tərəfindən sertifikatlar təqdim olunub, xatirə fotosu çəkilib.
