İyun ayının 2-dən etibarən Naxçıvan Dövlət Universitetində 2024/2025-ci tədris ilinin yay semestri üzrə imtahan sessiyasına başlanılıb. İmtahanların təşkili və keçirilməsi universitetin rektoru Elbrus İsayevin müvafiq əmri əsasında həyata keçirilir.
"Tehsil365" xəbər verir ki, sessiyanın ilk günlərindən etibarən rektor Elbrus İsayev imtahan prosesini şəxsən izləyib, tələbələrlə görüşərək onlara uğurlar arzulayıb. Rektor həmçinin imtahan mexanizmlərinə dair tələbələrin rəy və təkliflərini dinləyib.
Bu sessiyada bakalavr səviyyəsində 80 ixtisas, magistratura səviyyəsində isə 51 ixtisaslaşma üzrə ümumilikdə 9320 tələbə imtahan verir. İmtahanlar 2868 fənni əhatə edir. Onlardan 2197-si yazılı, 343-ü şifahi və praktiki, 326-sı isə elektron-test formasında keçirilir. İmtahanlar əsasən iki növbədə təşkil olunur və ardıcıllıq tələbələrin seçiminə uyğun müəyyənləşdirilib.
Tələbələrin imtahan cədvəlləri “E-cədvəl” mobil tətbiqi vasitəsilə təqdim olunub. Eyni zamanda, imtahan sualları semestrin əvvəlindən etibarən LMS platformasında yerləşdirilərək tələbələrin istifadəsinə verilib. Elektron-test imtahanlarının testləri isə 2025-ci ilin may ayının sonunadək sistemə yüklənərək aktivləşdirilib.
İmtahan nəticələri həmin gün ərzində tələbələrin şəxsi kabinetlərinə yerləşdirilir və onların “WhatsApp” nömrələrinə də göndərilir. Sessiya müddətində akademik borcu yaranan tələbələr üçün iyul ayının əvvəlində əlavə imtahan imkanı yaradılacaq. Bu, yalnız iki fənni əhatə edəcək.
İmtahanların təşkilində universitetin müxtəlif fakültələrindən olan İmtahan Komissiyası üzvləri və 100-ə yaxın nəzarətçi iştirak edir. Bütün imtahan zalları zəruri avadanlıqlar və müşahidə kameraları ilə təmin olunub.
Sessiyanın şəffaf və operativ keçirilməsi məqsədilə universitetdə 9 nəfərdən ibarət İmtahan Qərargahı və Apellyasiya Komissiyası fəaliyyət göstərir. Apellyasiya Komissiyası daxil olan müraciətləri operativ şəkildə araşdırır və bütün proseslər tam elektron qaydada həyata keçirilir.
Yay imtahan sessiyası beş həftə davam edəcək.
