Elm və Təhsil Nazirliyinin İnformasiya Texnologiyaları İnstitutunda növbəti elmi seminar keçirilib.
Bu barədə “Tehsil365”ə institutdan məlumat verilib.
AMEA-nın vitse-prezidenti, institutun baş direktoru akademik Rasim Əliquliyev seminarın “Zərərli proqram təminatının aşkarlanması üçün intellektual analiz metod və alqoritmlərinin işlənilməsi” mövzusunda dissertasiya işi (üçüncü və dördüncü fəsillər üzrə) çərçivəsində əldə olunan elmi-nəzəri nəticələrin müzakirəsinə həsr olunduğunu bildirib.
İnstitutun dissertantı Elşən Bağırov dissertasiya işi çərçivəsində aparılmış tədqiqatların nəticələrini təqdim edib. Tədqiqatçı “Windows” və “Android” əməliyyat sistemləri mühitində zərərli proqramların və zərərli proqram trafikinin aşkarlanması üçün statik və dinamik yolla əldə edilmiş müxtəlif növ əlamətlərdən istifadə etməklə klassifikasiya və klasterizasiya əsaslı maşın öyrənmə metodlarının işlənildiyini, təsvirlər əsasında zərərli proqramların aşkarlanması üçün transfer öyrənməyönümlü klassifikasiya modelinin işləndiyini, təlim məqsədilə zərərli proqram nümunələrinin sayının artırılması üçün Generativ Rəqib Şəbəkə modelinin işlənildiyini və artırılmış verilənlər üzərində maşın öyrənmə modellərinin yoxlanıldığını diqqətə çatdırıb.
E.Bağırov dissertasiya işində əldə olunmuş yekun nəticələri təqdim edib. Qeyd edib ki, iş çərçivəsində zərərli proqramlar və onların təbiəti, aşkarlanmaqdan yayınma üsullarının tədqiqi istiqamətində təhlil aparılıb, boşluqlar aşkar edilib, zərərli proqramların aşkarlanması ilə bağlı “Scopus” və “Web of Science” elmi bazalarında indeksləşən jurnal məqalələri və konfrans materialları araşdırılıb, aparılmış tədqiqatların illər üzrə trendi şərh edilib, bir sıra çatışmazlıqlar müəyyən edilib. Həmçinin dayanıqlı və effektiv zərərli proqram aşkarlanması sisteminin qurulması üçün qarşıya qoyulmuş məsələləri bir yerdə cəmləşdirən üçmərhələli ümumi arxitektura təklif edilib, modelin qurulması üçün istifadə edilən statik və dinamik əlamətlər fəzasından ən optimal əlamətlərin seçilməsi üçün yanaşma işlənilib. Təklif edilmiş arxitekturada aşkarlama modelinin real mühitdə tətbiqi zamanı izaholunma qabiliyyətinin yoxlanılması və monitorinqi nəzərə alınıb.
Məruzə ətrafında geniş fikir mübadiləsi aparılıb, tədqiqatçı ona ünvanlanan sualları cavablandırıb.
Daha sonra çıxış edən akademik Rasim Əliquliyev dissertasiya işi ilə bağlı təklif və tövsiyələrini səsləndirib. Alim tədqiqat işinin aktual elmi problemlərə həsr olunduğunu, əsaslı tədqiqatların aparıldığını qeyd edib. Akademik R.Əliquliyev səsləndirilən təkliflər nəzərə alınmaqla dissertasiya işinin növbəti mərhələyə keçirilməsini tövsiyə edib.