13 iyun 2025-ci il tarixində Azərbaycan Respublikası Milli Abilimpiya Federasiyasının təşkilatçılığı, Turizm və Sosial Xidmətlər üzrə Bakı Dövlət Peşə Təhsil Mərkəzi və Bakı Kulinariya Assosiyasiyasının dəstəyi ilə aşpaz və qənnadıçı peşələri üzrə respublika abilimpiya çempionatı keçirilib.
“Tehsil365” xəbər verir ki, bir mərhələli formatda təşkil olunan yarışda iştirakçılara peşə bacarıqları ilə yanaşı, yaradıcılıqlarını da nümayiş etdirmək imkanı verilib.
Aşpaz peşəsi üzrə Kənan Nəbiyev I yerə, Eşqin Cəfərov II yerə, Natiq Əhmədov III yerə layiq görülüb. Qənnadıçı peşəsi üzrə Firəngiz İbrahimova qızıl, Fidan Əhmədli gümüş, Əkbər Əhmədzadə bürünc medal qazanıb.
Qaliblər medal və diplomlarla, digər iştirakçılar isə sertifikat və hədiyyələrlə təltif olunublar. Tədbirin əsas məqsədi beynəlxalq səviyyəli yarışlara, xüsusilə də 2027-ci ildə Finlandiyada keçiriləcək XI Beynəlxalq Abilimpiya Çempionatına hazırlıq çərçivəsində Azərbaycanın milli komandasının formalaşdırılmasıdır.
Qeyd edək ki, 2025–2027-ci illəri əhatə edən dövrdə müxtəlif peşə istiqamətləri üzrə Abilimpiya yarışlarının keçirilməsi nəzərdə tutulur.