Belarusun paytaxtı Minsk şəhərində Sosial Strateji Tədqiqatlar və Analitik Araşdırmalar İctimai Birliyinin təşkilatçılığı ilə “Qərbi Azərbaycana Qayıdış Konsepsiyasının təşviqi” layihəsi çərçivəsində “Qayıdış, miqrasiya, stabillik: Azərbaycan təcrübəsi” adlı Dəyirmi Masa keçirilib.
“Tehsil365 “xəbər verir ki, tədbir Minskin mərkəzində yerləşən Avropa otelində baş tutub. Dəyirmi Masada Belarus ictimaiyyətinin nümayəndələri, Azərbaycanın Belarusdakı diaspor komitəsinin təmsilçiləri, Minsk şəhər Soveti və Belarus Miqrasiya Komitəsinin nümayəndələri, Belarus Dövlət İdman Akademiyasının tələbələri, “KINIK” MMC, “PORA” mərkəzi, “Akademtrans” təşkilatı və 18 saylı gimnaziyanın məsul şəxsləri iştirak ediblər.
Tədbiri giriş sözü ilə Sosial Strateji Tədqiqatlar və Analitik Araşdırmalar İctimai Birliyinin prezidenti açaraq layihənin məqsədi, icraçı və donor təşkilatlar barədə iştirakçılara məlumat verib.
Dəyirmi Masa Azərbaycan diasporası tərəfindən hazırlanan və Belarus əsilli gənc qızların təqdimatında “Uzundərə” milli rəqs proqramı ilə başlayıb.
Daha sonra beynəlxalq hüquq sahəsində ekspert Ziya Quliyev çıxış edərək Qərbi Azərbaycandan deportasiya olunan azərbaycanlıların keçmişdə üzləşdiyi çətinliklər, bu prosesin beynəlxalq hüquq kontekstində doğurduğu nəticələr və statistik göstəricilər barədə məlumat verib. O, həmçinin Qərbi Azərbaycan İcması tərəfindən hazırlanmış “Qərbi Azərbaycana Qayıdış Konsepsiyası” sənədi və onun beynəlxalq hüquq prinsiplərinə uyğunluğu, humanizm və ləyaqətli qayıdış mexanizmləri, Ermənistanın öhdəlikləri barədə geniş təqdimat edib.
“Akademtrans” Tədris Mərkəzinin eksperti Natalya Qarbuz və Sosial Strateji Tədqiqatlar və Analitik Araşdırmalar İctimai Birliyinin prezidenti İlqar Hüseynli miqrasiya məsələləri və Azərbaycan ilə Belarus arasında əməkdaşlıq mövzusunda çıxış ediblər.
Təqdimatlardan sonra geniş müzakirələr aparılıb, iştirakçılar tərəfindən verilən suallar cavablandırılıb. Belarus Azərbaycan İcması Konqresinin sədr müavini Oleq Bədəlov, Minsk Şəhər İcraiyyə Komitəsinin sədr müavini Anastasiya Fransuzova, şəhər administrasiyasının əməkdaşı Ekaterina Mixaylovskaya və Miqrasiya İdarəsinin baş mütəxəssisləri Nina Kosoykina və Tatyana Struk təqdimatçılara suallar ünvanlayıb və fikirlərini bildiriblər.
Dəyirmi Masa çay-kofe fasiləsi ilə yekunlaşıb.
Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir.
