Azərbaycan Dillər Universitetinin nəzdində fəaliyyət göstərən Konfutsi İnstitutunda məktəblilər arasında 18-ci “Çin dili körpüsü” beynəlxalq müsabiqəsinin Azərbaycan üzrə final mərhələsinin seçim turu keçirilib. Tədbir Çinin Azərbaycandakı səfirliyinin dəstəyi ilə bu ölkənin Beynəlxalq Təhsil Fondu və Konfutsi İnstitutu tərəfindən təşkil olunub.
Universitetdən “Tehsil365”ə bildirilib ki, müsabiqəyə orta məktəb və gimnaziya şagirdləri, eləcə də Konfutsi İnstitutundakı Çin dili kurslarının dinləyiciləri qatılıblar. Çinin Azərbaycandakı səfiri Lu Mey bildirib ki, müsabiqənin məqsədi məktəblilərin Çin dili və mədəniyyəti biliklərini nümayiş etdirməkdir: “Çin və Azərbaycanın dövlət başçılarının strateji rəhbərliyi ilə ölkələrimiz arasında münasibətlər daim inkişaf edir. Siyasi etimad möhkəmlənir, əməkdaşlıq güclənir, beynəlxalq arenada qarşılıqlı dəstək artır. Prezident İlham Əliyevin bu ilin aprelində Çinə səfəri zamanı liderlərimiz hərtərəfli strateji tərəfdaşlıq münasibətlərinin qurulduğunu elan etdilər. Bu, mədəni mübadilələrə, qarşılıqlı anlayışa və gənclərin Çin dilini öyrənmək imkanlarına yeni perspektivlər açdı.
Çin dili dünyanın ən qədim və ən geniş istifadə olunan dillərindən biridir, beş min illik sivilizasiyanın daşıyıcısıdır və Çinlə dünyanı birləşdirən mühüm körpüdür. Hazırda 190-dan çox ölkə və bölgədə Çin dili tədris olunur, 85 ölkə onu milli təhsil sisteminə daxil edib, 30 milyondan çox insan xaricdə Çin dili öyrənir. Azərbaycanda bu müsabiqə artıq 17 dəfə keçirilib və mədəni əlaqələrin tanınmış brendinə çevrilib. Yarışma dil, mədəniyyət və dostluq körpüsü rolunu oynayır.
Bu il müsabiqə “Çin dili ilə arzuların ardınca, gəncliyə layiq həyat” devizi ilə keçirilir. Ümid edirəm ki, Çin dilini bir “qızıl açar” kimi istifadə edərək həyat yolunuzda yeni imkanlar qazanacaq, Çin-Azərbaycan dostluğunun davamçıları olacaqsınız. Səfirlik olaraq təhsil və humanitar sahələrdə əməkdaşlığı genişləndirməyə, Çin dili tədrisini və gənclərin Çinə səfər imkanlarını dəstəkləməyə hazırıq”.
ADU-nun beynəlxalq əlaqələr üzrə prorektoru Jalə Qəribova çıxış edərək Azərbaycan-Çin təhsil əməkdaşlığının genişləndirilməsinin əhəmiyyətini vurğulayıb.
Konfutsi İnstitutunun direktoru Rafiq Abbasov isə iki ölkə arasında təhsil sahəsində genişlənən əməkdaşlıqdan danışıb. O qeyd edib ki, “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə” Çin dilinin Azərbaycanda tədrisinə yeni təkan verib. Sənəddə dil mübadiləsinin inkişafı, hər iki ölkənin təhsil müəssisələrində Çin və Azərbaycan dillərinin tədrisi, Konfutsi institutlarının inkişafına dəstək məsələləri yer alıb. HSK imtahanlarının uğurla keçirilməsi Çin dilini öyrənməyə marağın artdığını və tədrisin keyfiyyətinin yüksəldiyini göstərir.
Seçim turu iki mərhələdə keçirilib. İştirakçılar Çin dilində çıxış edib, Çin mədəniyyəti ilə bağlı sualları cavablandırıb və bədii nömrələr nümayiş etdiriblər. Onların çıxışları səfirlik nümayəndələrinin də daxil olduğu münsiflər heyəti tərəfindən qiymətləndirilib.
Müsabiqənin qalibləri Çində keçiriləcək beynəlxalq finalda iştirak edəcək. I yerə ADU Konfutsi İnstitutunun tələbəsi Kamil Bunyatov layiq görülüb. Bütün iştirakçılara sertifikatlar təqdim olunub.
