Azərbaycan Memarlıq və İnşaat Universitetinin (AzMİU) nəzdində fəaliyyət göstərən Fizika-riyaziyyat təmayüllü liseyin IX sinif şagirdi Ülvi Əliyev həm təhsil, həm də idman sahəsində qazandığı uğurlarla seçilir.
“Tehsil365” xəbər verir ki, o, 2024/2025-ci tədris ili üzrə Dövlət İmtahan Mərkəzinin keçirdiyi buraxılış imtahanlarında 267 bal toplayaraq liseyin yüksək nəticə göstərən şagirdlərindən biri olub. Lakin Ülvi Əliyevin nailiyyətləri bununla bitmir. Onun idman sahəsində qazandığı uğurlar da diqqətəlayiqdir.
Azərbaycan Juboksinq Citsu Federasiyasının üzvü olan idmançı son beş ildə keçirilən səkkiz nüfuzlu yarışın altısında birinci yerə layiq görülüb. O, Qara dəniz çempionatı, Aprel döyüşləri və Heydər Əliyevin anım gününə həsr olunmuş turnirlər də daxil olmaqla bir sıra yerli və beynəlxalq yarışlarda fəxri kürsüyə yüksəlib.
Zəka və fiziki hazırlığı bir arada cəmləşdirən Ülvi Əliyev əzmkarlığı, çalışqanlığı və qazandığı uğurlarla yaşıdları üçün əsl nümunəyə çevrilib.
