"Muxtar Respublikada 2025-ci il üzrə müəllimlər üçün sertifikatlaşdırma prosesinin növbəti mərhələsinə başlanılıb. Ölkə üzrə mərkəzləşdirilmiş qaydada aparılan sertifikatlaşdırma prosesi tam şəffaf şəkildə təşkil olunub".
"Tehsil365" xəbər verir ki, bunu Naxçıvan Muxtar Respublikasının təhsil naziri Elxan Nəcəfov cari il üzrə keçirilən sertifikatlaşdırma ilə bağlı jurnalistlərə açıqlamasında deyib.
O bildirib ki, bu gün sertifikatlaşdırma prosesinə 60-a yaxın müəllim cəlb olunub:
"İmtahan müddəti 120 dəqiqədir, imtahanda 60 sual verilir. Hər bir sual bir balla qiymətləndirilir. 30 baldan yuxarı nəticə göstərənlər müsahibə mərhələsinə cəlb olunur. 30-50 bal aralığında nəticə göstərən və müsahibədə uğur qazanan müəllimlərin əməkhaqlarına 10 faiz əlavə tətbiq edilir. 51-60 bal aralığında nəticə göstərən və müsahibədə uğur qazanan müəllimlərə isə 35 faiz əməkhaqqı artımı tətbiq olunur.
Məktəblərdə sertifikatlaşdırma prosesi bir neçə əsas istiqaməti əhatə edir: müəllim yönümlü, məktəb yönümlü və ümumilikdə, təhsil və tədris yönümlü yanaşmalar. Bu prosesin əsas prioritetlərindən biri müəllimlərin əmək şəraitinin və sosial vəziyyətinin yaxşılaşdırılmasıdır. Eyni zamanda, məqsəd müəllimlərin savadlılıq və peşəkarlıq səviyyəsinin ölçülməsi, onların bilik və bacarıqlarının daha obyektiv qiymətləndirilməsi və nəticə etibarilə məktəbə və təhsilə olan töhfələrinin artırılmasıdır".
Elxan Nəcəfov əlavə edib ki, prosesin ilk günündə infotur təşkil olunub. Bu infotur çərçivəsində rəsmi qurumların nümayəndələri, ictimaiyyət üzvləri, media mənsubları və digər şəxslər proseslə yerində tanış olublar.
Elxan Nəcəfovun sözlərinə görə, proses bütün namizədlər üçün bərabər imkanlar əsasında təşkil edilib. İmtahanlar elektron formatda həyata keçirilir və hər bir iştirakçı imtahan bitdikdən sonra nəticələrini sistem üzərindən şəffaf şəkildə görə bilir: “İnanırıq ki, yaradılmış bu şərait və indiyədək müəllimlərimiz üçün təqdim edilən dəstək, nəticə etibarilə, uğurlu nəticələrə səbəb olacaq.
Naxçıvan Muxtar Respublikası Təhsil Nazirliyi olaraq, Elm və Təhsil Nazirliyinin müəyyən etdiyi qaydalara uyğun şəkildə sertifikatlaşdırma prosesinə cəlb olunan müəllimlər üçün bütün resurslar təmin olunub. Bu resurslara videomateriallar, proqram təminatı, sınaq imtahanları və digər tədris vasitələri daxildir. Müəllimlərimiz bu imkanlardan faydalanıblar.
Ümumilikdə, Naxçıvanda 350-yə yaxın müəllimin sertifikatlaşdırma prosesində iştirak edəcəyi gözlənilir. Əminik ki, bu müəllimlər uğurlu nəticə göstərəcək, peşəkarlıqla fəaliyyətlərini davam etdirəcək və məktəblərimizə, şagirdlərimizə daha da yüksək səviyyədə töhfə verəcəklər".