Akkreditasiya vəziyyətin düzgün diaqnozunun qoyulması üçün bir vasitədir. Bu bizə imkan verir ki, real vəziyyəti düzgün qiymətləndirək, həmin vəziyyətin daha da yaxşılaşdırılması üçün ali təhsil müəssisələrinə dəstək olaq.
“Tehsil365” xəbər verir ki, bunu Təhsildə Keyfiyyət Təminatı Agentliyinin (TKTA) İdarə Heyətinin sədri Tural Əhmədov “Keyfiyyətə doğru addım: akkreditasiya prosesinə hazırlıq” seminarında çıxışı zamanı deyib. O bildirib ki, ötən ildən etibarən proqram səviyyəsində akkreditasiya işlərinə başlanılıb: “Ölkə üzrə ilk dəfə olaraq biz ibtidai sinif müəllimliyi ixtisası üzrə bu prosesi başladıq. Bu il isə məktəbəqədər təhsil sahəsində kadr hazırlığı ilə məşğul olan ali təhsil müəssisələrində qiymətləndirmələrə keçmişik. Düşünürəm ki, proqram akkreditasiyasının xüsusiyyətləri və xüsusilə cəmiyyətdə tez-tez işlənən terminologiyalarla bağlı müəyyən çarpazlaşdırmalar aparmaqla daha geniş mənzərəni görmək imkanı yaranır.
Proqram akkreditasiyasının nəticələri hələ Akkreditasiya Şurasına təqdim olunmadığı üçün bu barədə ictimaiyyətlə hər hansı məlumat paylaşmaq səlahiyyətimiz yoxdur. Etik olaraq da buna sadiq qalırıq. Amma müşahidələrimiz göstərir ki, keyfiyyətin artırılması istiqamətində əhəmiyyətli irəliləyişlər var”.