23 iyun 2025-ci il tarixində Azərbaycan Respublikasının Energetika Nazirliyinin əməkdaşları üçün Dövlət İmtahan Mərkəzinin İstedadın Psixometrik Diaqnostikası və Maarifləndirmə sektorunun müdiri Sevinc Məmmədovanın təqdimatında “Çevik və inkişaf yönümlü idarəetmə” mövzusunda təlim təşkil olunub.
“Tehsil365” xəbər verir ki, nəzəri və praktiki hissələrdən ibarət təlimdə effektiv resurs idarəçiliyi, resursların planlaşdırılması, izlənməsi və nəzarəti, prioritetlərin müəyyən olunması, komanda dinamikası və rolları (Belbin komanda rolları nəzəriyyəsi), komanda daxilində ünsiyyətin və münaqişələrin idarə olunmasının önəmi barədə iştirakçılara məlumat verilib.
Bundan əlavə, komandada münaqişələrin həlli üsulları, aktiv dinləmə, emosional zəka və resurs idarəçiliyi, empatiyanın və komandadaxili harmoniyanın təmin olunmasında emosional zəkanın rolu, istedadların idarə olunması və kəşfi, komandada üzvlərin güclü tərəflərinin müəyyən olunması (SWOT analizi), motivasiya və düzgün geridönüş vermə üsulları təlim çərçivəsində izah olunub.
Sonda iştirakçıların sualları cavablandırılıb.
