Gənclər və İdman Nazirliyinin dəstəyi, Dövlət Turizm Agentliyi və Azərbaycan Turizm və Menecment Universitetinin (ATMU) tərəfdaşlığı ilə Quba şəhərində “Gənc turizm liderləri–2” düşərgəsi təşkil olunub.
Bu barədə “Tehsil365”ə ATMU-dan məlumat verilib.
Açılış mərasimində Azərbaycan Turizm və Menecment Universitetinin, Gənclər və İdman Nazirliyinin və Dövlət Turizm Agentliyinin nümayəndələri çıxış edərək turizm sahəsində gənclərin fəal iştirakından və onların gələcəkdə milli turizm siyasətində oynayacaqları mühüm roldan danışıb.
ATMU-nun təhsil məsələləri üzrə rektor müşaviri Fərid Cabbarlı bildirib ki, bu layihə ölkəmizdə turizm sənayesinin inkişaf etdirilməsi, turizm siyasətinin uğurlu şəkildə həyata keçirilməsi və turizm potensialının xarici bazarlarda tanıdılması baxımından genişmiqyaslı işlər görmək üçün tələbələrə dəstək verməyə yönəlib.
Gənclər və İdman Nazirliyinin əməkdaşı Əli İsgəndərli turizm sahəsinə töhfə vermək və gənc turizmçilərə dəstək göstərmək məqsədi daşıyan bu cür layihələrin böyük önəm kəsb etdiyini vurğulayıb.
Dövlət Turizm Agentliyinin Turizm siyasəti və strategiyası şöbəsinin müdir müavini Günay Bayramova isə gəncləri bu cür layihələrdən faydalanmağa və turizm sahəsində bilik və bacarıqlarını artırmağa dəvət edib.
Üç gün davam edən düşərgənin əsas məqsədi “Əylənərək öyrənirik” metodu əsasında gənclərin turizm sahəsində bilik və bacarıqlarını qeyri-formal təhsil alətləri vasitəsilə inkişaf etdirmək olub. Tədbir eyni zamanda iştirakçılarda innovativ düşüncə tərzinin və liderlik keyfiyyətlərinin formalaşmasına xidmət edib.
Düşərgə çərçivəsində gənclərə ölkəmizin turizm sektorunda oynadıqları rolun önəmi aşılanıb və bildirilib ki, bu cür təşəbbüslər gənc turizmçilərin gələcək karyera yollarında stimul rolunu oynayır, onların peşəkar inkişafına töhfə verir.
Qeyd edək ki, düşərgə proqramında şəhər turu, master-klaslar, idman oyunları və təlimlər yer alıb. ATMU-nun tələbələri Quba Soyqırımı Memorial Kompleksini və Qırmızı qəsəbəni ziyarət edib, ekskursiyalarda iştirak ediblər.
