“Dünyanın dəyişən çağırışları qarşısında möhkəm dayana bilmək üçün yalnız bilik və elm kifayət deyil. Sadaladığım dəyərlər sırasında eyni zamanda dürüstlük, məsuliyyət, vətənə sevgi və vətəndaşlıq şüuru da ən azı bilik qədər vacibdir”.
“Tehsil365” xəbər verir ki, bu fikirləri elm və təhsil nazirinin müavini Kənan Kərimzadə Bakı Dövlət Universitetinin (BDU) “Məzun günü” tədbirində çıxışı zamanı səsləndirib.
Nazir müavini bildirib ki, ötən 100 ildən artıq dövrdə BDU yalnız elm, təhsil və tədqiqat müəssisəsi olmaqla kifayətlənməyib, eyni zamanda, xalqımızın intellektual inkişafında, onun milli kimliyinin formalaşmasında və dövlətçiliyimizin möhkəmlənməsində mühüm rol oynayıb: "Atalar sözlərinin birində deyilir ki, əgər bir il nəticə görmək istəyirsinizsə, buğda əkin. Əgər on il nəticə görmək istəyirsinizsə, ağac əkin. Əgər yüz il nəticə görmək istəyirsinizsə, o zaman insan yetişdirin". Bakı Dövlət Universiteti yüz ildən artıqdır ki, şərəf və qürurla bu müqəddəs missiyanın – insan kapitalının formalaşdırılması missiyasının öhdəsindən gəlir.
Ulu Öndər Heydər Əliyevin Bakı Dövlət Universiteti haqqında dediyi kimi: “Bu universitet həqiqəti axtaran, milli ruhu inkişaf etdirən bir ocaq, bir məktəb olmuşdur”. Bir əsrdən çox tarixi ərzində bu universitet çox sayda alim, hüquqşünas, müəllim, neçə-neçə ictimai-siyasi, dövlət xadimi yetişdirmişdir”. Kənan Kərimzadə qeyd edib ki, bu gün Azərbaycanda ali təhsil sisteminin inkişafı üçün dövlət tərəfindən genişmiqyaslı islahatlar həyata keçirilir. Onun sözlərinə görə, Prezident İlham Əliyevin rəhbərliyi ilə aparılan siyasət nəticəsində ali təhsilin maddi-texniki bazası gücləndirilib, tədrisə müasir texnologiyalar daxil edilib: “Əlbəttə, 25 000 nəfərdən artıq tələbəsi olan təhsil müəssisəsinin flaqman universitet statusunu qoruması, keyfiyyətli təhsilin təşkili, özünəməxsus sosial mühitin yaradılmasına ölkəmizdə elm və ali təhsilin inkişafına dövlət səviyyəsində göstərilən diqqət və qayğının artırılması da xüsusi şərait yaratmışdır. Sevinc hissi ilə qeyd etmək istəyirəm ki, ali təhsilin əlçatanlığının təmin olunması istiqamətində 2025–2026-cı tədris ilindən etibarən rekord sayda – 75 000 şəxs tələbə adını qazanacaq”. O,qeyd edib ki, Azərbaycan universitetləri artıq beynəlxalq reytinqlərdə də tanınmağa başlayıb. Bakı Dövlət Universitetinin QS 2026 dünya universitetləri siyahısında 688-ci yerdə qərarlaşmasını bu sahədə böyük nailiyyət kimi dəyərləndirib. Nazir müavini bu nəticənin həm Azərbaycanda, həm də Cənubi Qafqaz regionunda ən yüksək göstərici olduğunu vurğulayıb.
Kənan Kərimzadə çıxışında həmçinin universitetin professor-müəllim heyətinə, valideynlərə təşəkkürünü bildirib. Bütün məzunları təbrik edərək onlara gələcək həyatlarında uğurlar arzulayıb: “Ümid edirəm ki, harada olmağınızdan asılı olmayaraq, bilik və bacarığınızla bu müqəddəs ali təhsil ocağının adını daim uca tutacaqsınız, onu uğurlarınızla təmsil edəcəksiniz və yeni nəsillər üçün ilham mənbəyinə çevriləcəksiniz.
Bu gün məzun olan altı mindən çox tələbə Bakı Dövlət Universitetinin keçdiyi yüz ildən artıq yolun davamçıları olaraq universitetin tarixində xüsusi bir yerə sahibsiniz. Bu gündən sonra sizə veriləcək diplom sadəcə bir sənəd deyil. Bu sizin əzminizin, zəhmətinizin nəticəsi olmaqla yanaşı, həm də bir məsuliyyət və öhdəlikdir. Bu, ölkəmizin sabahı naminə sizə bəslənən inamın və ümidin rəmzidir.Qarşınızda çoxlu sayda imkanlar var və əminəm ki, daha böyük imkanlar olacaq. Amma bu imkanlarla yanaşı, yenə qeyd edirəm ki, böyük məsuliyyətiniz və öhdəliyiniz var”, - deyə nazir müavini qeyd edib.