"Şəhidin səsi" proqramında Şəhid Aslan Rzayev yad ediləcək.
"Tehsil365"in layihəsi olan "Şəhidin səsi" proqramında bu dəfə Vətən müharibəsi şəhidi, Manqa komandiri, çavuş Rzayev Aslan Süleyman oğlu yad ediləcək. Verilişin aparıcısı Gülgəz Qasımzadə olacaq.”Şəhidin Səsi” proqramı 30 iyun saat 18:00-da yayımlanacaq.
Aslan Rzayev 21 yanvar 1995-ci ildə Bakı şəhərində anadan olub. 2001-ci ildə Maştağa qəsəbəsində yerləşən 108 saylı orta məktəbdə təhsil almağa başlayıb və 2012-ci ildə həmin məktəbi bitirib. Elə həmin il Azərbaycan Texniki Universitetinin “Avtomatika və Kompüter Texnikası” fakültəsinə qəbul olub.
Ali təhsilini başa vurduqdan sonra hərbi xidmətini Ağcabədi rayonunun Yuxarı Qiyaməddinli kəndində, düşmən mövqelərinə 60 metr məsafədə yerləşən ərazidə keçib.
2016-cı ildə “Kontakt Home” şirkətində satış məsləhətçisi kimi çalışan Aslan Rzayev eyni zamanda şirkətin futbol komandasında hücumçu kimi çıxış edib.
2018-ci il avqustun 26-da ailə həyatı quran şəhidin 2019-cu il mayın 21-də Altay adlı oğlu dünyaya gəlib.
2020-ci ilin 30 sentyabr tarixində çağırış əsasında Vətən müharibəsində iştirak edən Aslan Rzayev Füzuli, Cəbrayıl və Xocavənd uğrunda gedən döyüşlərdə qəhrəmanlıq nümayiş etdirib. 13 oktyabrda Hadrut istiqamətində, Ərgünəş dağı uğrunda gedən döyüşlərdə qəhrəmancasına şəhid olub.
Azərbaycan Respublikasının Prezidenti İlham Əliyevin sərəncamına əsasən şəhid Aslan Rzayev ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif edilib.