Azərbaycan Turizm və Menecment Universitetində (ATMU) “Məzun 2025” tədbiri keçirilib.
Dövlət Himninin səsləndirilməsi ilə başlanan tədbirdə şəhidlərimizin əziz xatirəsi bir dəqiqəlik sükutla yad edilib.
Bu barədə “Tehsil365”ə ATMU-dan məlumat verilib.
Tədbirdə çıxış edən ATMU-nun rektoru İlham Mədətov diqqətə çatdırıb ki, məzun olmaq yalnız təhsil səviyyəsinin başa çatması deyil, eyni zamanda, tələbələrin əldə etdikləri bilik və bacarıqları cəmiyyətin rifahı üçün tətbiq edəcəkləri yeni bir dövrün başlanğıcıdır. Rektor ölkədə ali təhsil sahəsində həyata keçirilən uğurlu dövlət siyasətindən və ATMU-nun son illərdə əldə etdiyi nailiyyətlərdən danışıb.
ATMU-da bu il bakalavr pilləsində 12 ixtisas üzrə 330 nəfər, magistratura pilləsində isə 275 nəfər tələbə məzun olub. İlham Mədətov qeyd edib ki, əldə olunan nailiyyətlər ölkə rəhbərliyinin diqqət və qayğısı, dövlət və özəl sektorun universitetə göstərdiyi dəstək sayəsində mümkün olub.
Azərbaycan Respublikası Dövlət Turizm Agentliyi sədrinin müavini Azadə Hüseynova çıxışında peşəkar kadrlara əmək bazarında hər zaman böyük ehtiyac olduğunu vurğulayıb və ATMU məzunlarını turizm sahəsinin dəyərli mütəxəssisləri kimi görmək istədiyini qeyd edib.
Milli Məclisin deputatı, Azərbaycan Turizm Agentlikləri Assosiasiyasının İdarə Heyətinin sədri Göydəniz Qəhrəmanov məzunları təbrik edib, onlara həyatlarının yeni mərhələsində uğurlar arzulayıb.
Bakı Turizm Peşə Məktəbinin direktoru Neylufər Kərimova və Avstriyanın IMC Krems Tətbiqi Elmlər Universitetinin AATP üzrə koordinatoru Jens Peter də məzunlara təbriklərini çatdıraraq, onların ölkəmizin turizm sektorunun sürətli inkişafına töhfə verəcəklərinə əmin olduqlarını ifadə ediblər.
Tədbirin rəsmi hissəsi universitetin 2024/2025-ci tədris ili məzunlarından ixtisas, fakültə və universitet birincilərinə plaketlər, ATMU və Avstriyanın IMC Krems Tətbiqi Elmlər Universitetinin məzunlarına diplomlar, ictimai və akademik həyatında fəallığı ilə seçilən tələbələrə fəxri fərmanlar təqdim olunması və məzunların ənənəvi “papaq atma” mərasimi ilə başa çatıb.
Daha sonra konsert proqramı təqdim edilib.
