Azərbaycan Milli Elmlər Akademiyası (AMEA) ilə Türkiyə Elmi və Texnoloji Tədqiqat Şurası (TÜBİTAK) arasında əməkdaşlıq çərçivəsində ilk müştərək layihə müsabiqəsi 6 avqust 2024-cü il tarixində elan edilib. Müsabiqə AMEA-nın elmi müəssisələri ilə Türkiyənin universitet və tədqiqat institutlarının alimlərini urbanizasiya, şəhər və regional planlaşdırma, mədəniyyətlərarası qarşılıqlı əlaqə, dil birliyi, seysmologiya, rəqəmsal transformasiya, dairəvi iqtisadiyyat və inkişaf istiqamətlərində birgə elmi layihələr hazırlamağa dəvət edib.
“Tehsil365 “ xəbər verir ki, Müsabiqəyə AMEA-nın müxtəlif institutları və regional bölmələri ilə yanaşı, Mərkəzi Elmi Kitabxana və Rəyasət Heyəti Aparatının alimləri Türkiyənin 10-dan çox elm və təhsil qurumunun mütəxəssisləri ilə birlikdə ümumilikdə 20 müştərək layihə təqdim ediblər. Texniki ekspertizadan uğurla keçən 15 layihə elmi ekspertizaya göndərilib və hər bir layihə həm AMEA, həm də TÜBİTAK tərəfindən 4 müstəqil ekspert tərəfindən qiymətləndirilib.
Ekspertlərin rəyi ilə 4 layihə hər iki tərəfdən dəstəklənmək üçün seçilib. Seçilmiş layihələr AMEA Nəsimi adına Dilçilik İnstitutu ilə Ankara Universiteti, AMEA Arxeologiya və Antropologiya İnstitutu ilə Qaradəniz Texniki Universiteti, AMEA Abbasqulu Ağa Bakıxanov adına Tarix İnstitutu ilə Ondoqquz May Universiteti və AMEA Memarlıq və İncəsənət İnstitutu ilə Çanaqqala Onsekkiz Mart Universiteti arasında həyata keçiriləcək.
Qeyd edək ki, seçilmiş layihələrin icrası 2 il müddətində planlaşdırılır və bu əməkdaşlıq Azərbaycan-Türkiyə elmi əlaqələrinin inkişafında mühüm addım hesab olunur.
