“Müasir dövrdə Azərbaycanın təhsil sistemində rus bölmələrinin nə strateji, nə pedaqoji, nə də texnoloji baxımdan aktuallığı qalmayıb. Artıq bugünkü dünyada nə rus dili, nə də sovet dövrünün ideoloji mirası gələcək üçün üstünlük təşkil etmir. Texnologiya, süni intellekt və rəqəmsal iqtisadiyyatın sürətlə inkişaf etdiyi bir dövrdə Azərbaycanın əsas hədəfi bu qlobal trendlərə uyğunlaşmaq olmalıdır. Bu isə yalnız yeni yanaşmalar və doğru seçimlər tələb edir”.
Bu fikirləri "Tehsil365"ə açıqlamasında təhsil üzrə ekspert Kamran Əsədov deyib. O bildirib ki, "Rus bölmələrinin qorunub saxlanması sadəcə keçmişə bağlılığın və inersiyanın nəticəsidir. Halbuki Çin dili bölmələrinin yaradılması Azərbaycanın gələcəyə yönələn baxışının, iqtisadi əməkdaşlıq, texnoloji tərəfdaşlıq və innovasiya sahəsində inkişaf istəyinin təzahürüdür."
Ekspert qeyd edib ki, "Təkcə 2023-cü ildə dünyanın ən çox danışılan dili Çin dili olub. Hazırda Çin dünya texnologiya bazarının 28 faizinə sahibdir və bu pay hər il artmaqda davam edir. Azərbaycan bu bazardan pay almaq, müasir ticarət, enerji, mühəndislik və robot texnikası sahələrində irəliləmək istəyirsə, təhsil sistemində strateji dönüş etməli, rus yönümlü deyil, Çin yönümlü modelə keçid etməlidir."
"Bu, sadəcə bir dil məsələsi deyil – bu, gələcək üçün atılacaq strateji addımdır", – deyə Kamran Əsədov vurğulayıb.
Onun sözlərinə görə, "Rus bölmələrinin yerini Çin bölmələri tutmalıdır. Çünki biri keçmişin yadigarıdır, digəri isə gələcəyin açarıdır."
"Texnologiya əsrində rus dilinə deyil, Çin dilinə investisiya etməliyik. Gələcəyin bazarı Şərqdədir. Qərbi imitasiya edib Şərqi unudanlar isə gələcəyi itirirlər", – deyə ekspert əlavə edib.
Sonda Kamran Əsədov bildirib: "Azərbaycan təhsil sistemi zamanın tələblərinə uyğun yenidən qurulmalı, Çin dili bölmələri açılmalı, rus bölmələri isə tarixi mərhələsini başa vurmalıdır. Gələcək, keçmişin deyil, dəyişimin tərəfindədir."