Şəki -Zaqatala regionunda fəaliyyət göstərən teatr kollektivlərinin iştirakı ilə Şəkidə Azərbaycan Teatr Xadimləri İttifaqı İdarə Heyətinin səyyar iclası keçirilib. İclas Şəki-Zaqatala Regional Mədəniyyət İdarəsinin və Azərbaycan Teatr Xadimləri İttifaqının birgə təşkilatçılığı, Mədəniyyət İşçiləri Həmkarlar İttifaqı Şəki rayon Komitəsinin dəstəyi ilə keçirilib.
Bu barədə “Tehsil365”ə İttifaqdan məlumat verilib.
Bildirilib ki, Şəki şəhər Heydər Əliyev Mərkəzində reallaşan tədbirdə İttifaqın sədri Hacı İsmayılov, sədr müavinləri İlham Namiq Kamal, Azad Şükürov, İdarə Heyətinin üzvləri İlham Əsgərov, Mərahim Fərzəlibəyov, məsul katib Aidə Qafarova, hüquqşünas Könül Ələkbərova, Akademik Milli Dram Teatrının ədəbi hissə müdiri Cavid Zeynallı, Şəki-Zaqatala Regional Mədəniyyət İdarəsinin rəisi vəzifəsini icra edən Emil Bədəlov, Şəki Dövlət Dram Teatrının direktoru və baş rejissoru Mirbala Səlimli, Qax Gürcü Teatrının direktoru Zita Xəlilova və Şəki-Zaqatala regionunda fəaliyyət göstərən teatrların nümayəndələri iştirak ediblər.
İclasdan əvvəl iştirakçılar Ümummilli Lider Heydər Əliyevin heykəli qarşısına gül dəstələri qoyub, Ulu Öndərin xatirəsini dərin ehtiramla yad ediblər.
İttifaq sədri Hacı İsmayılov tədbirdə çıxış edərək bildirib ki, məqsəd regionda fəaliyyət göstərən dövlət və xalq teatrlarının bu günü və gələcək fəaliyyəti barədə fikir mübadiləsinin aparılmasıdır.
Daha sonra teatr sahəsində uğurlu fəaliyyət göstərən şəxslərə mükafatlar təqdim olunub.
Sonda regionda fəaliyyət göstərən teatr nümayəndələrinin çıxışları dinlənilib, onları maraqlandıran suallar cavablandırılıb, gələcək fəaliyyətləri barədə tövsiyələr verilib.
