AMEA-nın müxbir üzvü Oktay Qasımovun sədrliyi ilə baş tutan iclasda institutun nəzdində fəaliyyət göstərən laboratoriyaların 2025-ci ilin ilk yarımilliyi üzrə elmi və elmi-təşkilati fəaliyyətinə dair hesabatları dinlənilib və geniş müzakirələr aparılıb. Laboratoriya rəhbərləri tərəfindən təqdim olunan hesabatlarda aparılan tədqiqatların nəticələri, elmi nəşrlər, beynəlxalq əməkdaşlıqlar və əldə olunmuş yeni elmi nəticələr ətraflı şəkildə təqdim olunub. Elmi Şura üzvləri tərəfindən laboratoriyaların fəaliyyətinə dair təkliflər səsləndirilib, mövcud problemlərin aradan qaldırılması və gələcək hədəflərə dair konkret tövsiyələr verilib.
“Tehsil365 “xəbər verir ki, daha sonra AR Elm və Təhsil Nazirliyi Biofizika İnstitutunun Gənc Alim və Mütəxəssislər Şurasının 2025-ci il üzrə yarımillik fəaliyyəti haqqında məlumat təqdim olunub. Məlumatda gənc alimlərin iştirakı ilə keçirilmiş seminarlar, elmi-praktik tədbirlər, yerli və beynəlxalq layihələrə qoşulma səyləri və elmi məqalələrin nəşri kimi istiqamətlər üzrə görülmüş işlər qeyd edilib. Şura üzvlərinin fəallığı müsbət qiymətləndirilib və onların instituta töhfə verən təşəbbüsləri dəstəklənib.
İclas çərçivəsində, həmçinin institutda fəlsəfə doktoru proqramı üzrə doktoranturaya qəbul imtahanının keçirilməsi ilə bağlı məsələlərə də toxunulub. “Biofizika”, “Biokimya” və “Genetika” fənləri üzrə imtahan sualları Elmi şura tərəfindən müzakirə olunaraq təsdiq edilib. Sualların hazırkı elmi tələblərə uyğunluğu, proqramlara uyğun strukturu və namizədlərin elmi hazırlıq səviyyəsini qiymətləndirməyə imkan verən meyarlar əsasında tərtib olunduğu bildirilib.
İclasın sonunda cari məsələlərə baxılıb. Elmi əməkdaşların beynəlxalq elmi bazalarda indekslənən jurnallarda nəşr olunmuş məqalələrinin dəstəklənməsi, gənc tədqiqatçıların elmi ezamiyyətləri və maddi-texniki bazanın təkmilləşdirilməsi ilə bağlı məsələlər müzakirə olunaraq müvafiq qərarlar qəbul edilib.
Sonda institutun gələcək elmi strategiyası, prioritet tədqiqat istiqamətləri və innovativ yanaşmaların tətbiqi ilə bağlı fikir mübadiləsi aparılıb.
İclas iştirakçıları institutun fəaliyyətində müşahidə olunan müsbət dinamikanın qorunub saxlanmasının və daha yüksək nəticələrin əldə olunmasının vacibliyini vurğulayıblar.