“Aşura günü təkcə bir matəm və hüzn günü deyil. Bu gün, həm də vicdanın, ədalətin, elmin və mənəviyyatın bizə verdiyi dərsləri anlamaq üçün bir fürsətdir. Kərbəla çölündə şəhid olanlar yalnız bir siyasi ideya uğrunda deyil, haqqın tərəfində dayanmağın və cəhalətə qarşı qalxmağın simvolu oldular”.
Bu fikirləri "Tehsil365"ə açıqlamasında təhsil üzrə ekspert Kamran Əsədov deyib. O bildirib ki, "Aşura bizə göstərir ki, nadanlıqdan xilas olmaq və cəmiyyət olaraq tərəqqi etmək üçün bu tarixi hadisədən dərs çıxarmaq vacibdir. İmam Hüseynin qiyamı və onun yol yoldaşlarının fədakarlığı göstərir ki, elmə, düşüncəyə və haqq sözə sahib çıxmayan cəmiyyətlər zülmün və ədalətsizliyin altında əzilməyə məhkumdur."
Ekspertin sözlərinə görə, "Bu baxımdan təhsil Aşuranın bizə verdiyi ən mühüm mesajlardan biridir. Cəhalətlə mübarizənin yolu məktəbdən, universitetdən keçir. Əgər biz Hüseynin yolunu davam etdirmək istəyiriksə, övladlarımıza yalnız dini dəyərlər deyil, həm də savad, mənəviyyat və vicdan aşılamağı bacarmalıyıq. Bizə susan deyil, sorğulayan; boyun əyən deyil, haqqı müdafiə edən gənclər lazımdır."
"Bu gün Kərbəla bizə deyir ki, təhsilsiz cəmiyyətlər 1400 il əvvəlki zülmü bu gün də yaşaya bilər. Unutmamalıyıq ki, Hüseynin yoluna sahib çıxmaq yalnız göz yaşı ilə deyil, düşüncə, elm və ədalət sevgisi ilə mümkündür," – deyə Kamran Əsədov vurğulayıb.
Onun fikrincə, "Aşura bir dərsdir. Bu dərsi oxumamaq isə cəhalətin davamına səbəb ola bilər.".