Təhsil, Elm və Gənclər Nazirinə yeni müavin təyin edilib

Təhsil, Elm və Gənclər Nazirinin müavini vəzifəsinə hüquq elmləri doktoru, professor Zviad Qabisonia təyin olunub. Təhsil365 xəbər verir ki, bu barədə Təhsil, Elm və Gənclər Nazirliyi rəsmi məlumat yayıb. Nazirliyin bildirdiyinə görə, yeni təyinat Zviad Qabisonianı nazirliyin kollektivinə şəxsən təqdim edən nazir Givi Mikanadze tərəfindən elan olunub. Nazir, Qabisonianı yeni vəzifəyə təyin olunması münasibətilə təbrik edib və ona gələcək fəaliyyətində uğurlar arzulayıb. Məlumatda qeyd olunur ki, Zviad Qabisonianın dövlət və özəl sektorda, o cümlədən təhsil sahəsində uzunillik təcrübəsi var. O, müxtəlif illərdə Şota Rustaveli adına Gürcüstan Milli Elmi Fondunun baş direktoru, Antikorrupsiya Bürosunda hüquqi texnologiyalar üzrə ekspert, Gürcüstan Ədliyyə Nazirliyində rəqəmsal idarəetmə və süni intellekt üzrə hüquqi məsələlər üzrə məsləhətçi, həmçinin Təhsil, Elm və Gənclər Nazirliyində rəqəmsal təhsil və süni intellekt üzrə ekspert kimi fəaliyyət göstərib. Yeni nazir müavini həm də elmi sahədə fəal fəaliyyəti ilə tanınır. O, beynəlxalq özəl hüquq, texnologiya hüququ, internet hüququ, süni intellekt, rəqəmsal idarəetmə və hüquq texnologiyaları üzrə 7 kitabın və 50-dən çox elmi məqalənin müəllifidir.