"Şəhidin səsi" proqramında Raul Piriyev yad ediləcək
1997-ci il iyunun 4-də Şəmkir rayonunun Kür qəsəbəsində anadan olan Piriyev Raul Zabid oğlu Azərbaycanın igid oğullarından biri kimi yaddaşlara yazılıb.
"Tehsil365" xəbər verir ki, 2003-cü ildə Kür qəsəbəsindəki H.Z.Tağıyev adına 2 saylı tam orta məktəbdə təhsil həyatına başlayan Raul, sonradan ailəsi ilə birlikdə Bakı şəhərinə köçərək, təhsilini Sabunçu rayonundakı F. Bayramov adına 22 saylı tam orta məktəbdə davam etdirib. 2015-ci ildə orta məktəbi bitirərək Azərbaycan Texniki Universitetinin “Dəmiryol nəqliyyatı və təsərrüfatı mühəndisliyi” fakültəsinə qəbul olunub. Universitetdə təhsil aldığı müddətdə Raul fəallığı ilə seçilərək qrup rəhbəri (starosta) kimi fəaliyyət göstərib.
Təhsil müddətində paralel olaraq 2016-cı il aprelin 25-də McDonald's restoranının Gənclik filialında işə başlayan Raul burada da öz məsuliyyəti ilə seçilib, “İlin ən yaxşı işçisi”, “İlin ən sürətli işçisi” kimi müxtəlif nominasiyalarda diplom və hədiyyələrlə təltif olunub.
2019-cu il iyulun 2-də bakalavr pilləsi üzrə ali təhsilini başa vurduqdan sonra, həmin ilin oktyabrın 3-də hərbi xidmətə çağırılıb. 2019-cu il oktyabrın 8-də hərbi xidmətə yollanan Raul ilkin olaraq Ağcabədidə xidmətə başlayıb. 2019-cu ilin dekabrında isə könüllü olaraq Xüsusi Təyinatlı Qüvvələrin sırasına qoşularaq Cəlilabadın Göytəpə qəsəbəsində yerləşən hərbi hissədə xidmətini davam etdirib.
2020-ci il sentyabrın 27-də başlanan Vətən müharibəsi zamanı Raul Piriyev Murovdağ, Kəlbəcər, Xocavənd, Füzuli və Cəbrayıl istiqamətində gedən döyüşlərdə qəhrəmanlıq göstərib. O, 2020-ci il oktyabrın 5-də Cəbrayıl uğrunda gedən ağır döyüşlərdə qəhrəmancasına şəhidlik zirvəsinə ucalıb və oktyabrın 15-də Bakı şəhərinin Maştağa qəsəbəsində yerləşən Şəhidlər xiyabanında dəfn olunub.
Ali Baş Komandanın sərəncamları ilə Raul Piriyev aşağıdakı orden və medallarla təltif olunub:
1. "Şücaətə görə" medalı
2. "Döyüşdə fərqlənməyə görə" medalı
3. "Füzulinin azad olunmasına görə" medalı
4. "Vətən uğrunda" medalı
5. "Cəsur döyüşçü" medalı
6. "Bayraq" ordeni
7. "Cəbrayılın azad olunmasına görə" medalı
8. "Kəlbəcərin azad olunmasına görə" medalı
Şəhid Raul Piriyev vətənpərvərliyi, igidliyi və fədakarlığı ilə Azərbaycan gəncləri üçün örnək olaraq xatirələrdə yaşayacaq.
Qeyd edək ki, şəhidin xatirəsinə həsr olunan veriliş “Şəhidin səsi” proqramında, Gülgəz Qasımzadənin təqdimatında, 21 iyul saat 18:00-da yayımlanacaq.