İyulun 10-da ADA Universitetində “Sertifikatlaşdırma 2025: peşəkar müəllim – keyfiyyətli təhsil” adlı tədbir baş tutub. Tədbirdə bu il keçirilən sertifikatlaşdırma prosesində yüksək nəticə göstərən təhsilverənlər, təhsil ekspertləri və digər qonaqlar iştirak ediblər.
“Tehsil365” xəbər verir ki,tədbirdə geniş təqdimatla çıxış edən elm və təhsil naziri Emin Əmrullayev bildirib ki, sertifikatlaşdırmanın əsas məqsədi müəllimlərin bilik və bacarıqlarını obyektiv qiymətləndirməklə təhsildə keyfiyyəti artırmaqdır. Nazir qeyd edib ki, bu proses nəticəsində ölkənin peşəkar müəllim potensialı daha aydın şəkildə müəyyən olunur.
Emin Əmrullayev 2022–2025-ci illər ərzində təşkil olunmuş imtahanlarda 80 mindən çox müəllimin iştirak etdiyini diqqətə çatdırıb. Onun sözlərinə görə, 2026-cı ilin sonunadək bütün müəllimlər sertifikatlaşdırma prosesindən keçmiş olacaqlar.
Nazir, həmçinin sertifikatlaşdırmanın müəllimlərin əməkhaqqına təsir etdiyini bildirib. Qeyd olunub ki, 2022-ci ildən etibarən tətbiq olunan sistem nəticəsində müəllimlərin orta aylıq əməkhaqqı 20% artaraq 720 manata çatıb. 2025–2026-cı tədris ili üzrə isə bu göstərici 965 manat olacaq.
Tədbir zamanı Emin Əmrullayev prosesin nəticələrinə dair statistik məlumatları da bölüşüb və media nümayəndələrinin suallarını cavablandırıb.
