2020-ci ilin iyul ayında Azərbaycan ilə Ermənistan arasında baş vermiş Tovuz döyüşləri, iki ölkənin sərhədində – Azərbaycanın Tovuz rayonu ilə Ermənistanın Tavuş vilayəti arasındakı ərazidə baş tutmuşdur.
"Tehsil365" xəbər verir ki, 2020-ci il iyulun 12-də Ermənistan silahlı qüvvələri Tovuz rayonu istiqamətində dövlət sərhədini pozaraq qəfil hücuma keçməyə cəhd göstərdi. Azərbaycan Ordusunun peşəkar və qətiyyətli cavabı nəticəsində Ermənistan ordusuna ciddi zərbələr endirildi, onlar ağır itkilərlə geri çəkilməyə məcbur oldular.
İyulun 13-nə keçən gecə döyüşlər daha da şiddətləndi. Ermənistan artilleriyası Tovuzun Dondar Quşçu və Ağdam kəndlərini atəşə tutdu. Gecə döyüşlərində düşmənin dayaq məntəqələri, hərbi texnikası və canlı qüvvəsi məhv edildi.
İyulun 13-də Prezident, Ali Baş Komandan İlham Əliyevin sədrliyi ilə Təhlükəsizlik Şurasının iclası keçirildi. Prezident şəhidlərə rəhmət, yaralılara şəfa dilədi və vurğuladı ki, şəhidlərimizin qanı yerdə qalmayıb. Azərbaycanın haqlı mövqeyindən geri çəkilməyəcəyini və bütün imkanlarla özünü müdafiə edəcəyini bildirdi.
İyulun 14-də döyüşlər davam etdi. Düşmən Ağdam və Əlibəyli kəndlərini ağır silahlardan atəşə tutdu. Bu hücumlar zamanı general-mayor Polad Həşimov, polkovnik İlqar Mirzəyev və digər hərbi qulluqçularımız qəhrəmancasına şəhid oldular. Həmçinin 76 yaşlı mülki şəxs Əziz Əzizov da düşmən atəşi nəticəsində həlak oldu.
Tovuz döyüşləri iyulun 17-də Azərbaycan Ordusunun qələbəsi ilə başa çatdı, heç bir ərazi itkisi olmadı. Dekabrın 9-da Prezidentin sərəncamı ilə Polad Həşimov və İlqar Mirzəyev Azərbaycanın Milli Qəhrəmanı fəxri adına layiq görüldülər. Döyüşlərdə iştirak etmiş hərbi qulluqçular müxtəlif orden və medallarla təltif edildilər.
Bu hadisələr xalqda vətənpərvərlik ruhunu daha da gücləndirdi. İyulun 14-dən 15-nə keçən gecə on minlərlə gənc paytaxtda yürüş edərək orduya dəstəyini göstərdi. Minlərlə gənc ordu sıralarına yazılmaq üçün müraciət etdi.
Tovuz döyüşləri Aprel döyüşlərindən sonra müasir hərb tariximizdə yeni mərhələ oldu. Bu döyüşlər Ermənistanın işğalçılıq siyasətinin ifşasına və xalqımızın birliyinin nümayişinə səbəb oldu.
Tovuz döyüşləri də Azərbaycanın hərb tarixinə zəfər döyüşü kimi daxil oldu. Döyüşlər bir daha göstərdi ki, Azərbaycan Ordusu düşmənin hər cür təxribatlarının və gözlənilməz hücumlarının qarşısını qətiyyətlə almaqda çətinlik çəkmir. 100-dən çox hərbçisi və onlarla hərbi obyektləri məhv edilən Ermənistan silahlı bölmələrinin şəxsi heyəti hətta səngərləri qoyub qaçdı. Döyüşlər zamanı bir neçə gün ərzində yüzlərlə yaralı və ölü daşıyan ermənilər itkilərdən dəhşətə gəldilər. Təcavüzkar Ermənistan cəbhədəki ağır uğursuzluğunu xalqdan gizlədərək, hərbi rəhbərliyin doğru olmayan məlumatlarını yayırdı.
Cəmi bir neçə ay sonra, 27 sentyabrda başlayan 44 günlük Vətən müharibəsi Tovuzda başlayan əzm və inamın davamı oldu. Azərbaycan Ordusu düşməni məğlub edərək ərazi bütövlüyümüzü bərpa etdi.
Hər il 12 iyul Azərbaycan xalqı tərəfindən Tovuz döyüşləri şəhidlərinin Anım Günü kimi qeyd olunur.