"Azərkosmos"un nəzdində fəaliyyət göstərən KOSMİK Akademiyanın təşkilatçılığı ilə yaradılmış Milli Elmi Komanda, Asiya-Sakit Okean Regionu Kosmik Agentliklərinin Forumu (APRSAF) və Yaponiya Aerokosmik Tədqiqatlar Agentliyi (JAXA) ilə əməkdaşlıq çərçivəsində keçirilən beynəlxalq "APRSAF CanSat 2025" müsabiqəsində birinci yerə layiq görülüb.
Tehsil365 xəbər verir ki, 12-13 iyul tarixlərini əhatə edən və Yaponiyanın Vakayama şəhərində keçirilən beynəlxalq "CanSat" müsabiqəsində Azərbaycanı ölkəmizin müxtəlif ali təhsil müəssisələrində təhsil alan dörd tələbədən ibarət komanda təmsil edib. Tələbələrə mentorluq dəstəyi isə "Azərkosmos"un ekspert əməkdaşı tərəfindən göstərilib.
Müsabiqə çərçivəsində komandalar ölçüsü 124 mm uzunluqdan və 68 mm diametrdən kiçik, çəkisi isə 250-300 qram aralığında olan minipeyk modelini hazırlamalı və sınaqdan keçirməli idilər. Bu praktiki təcrübə tələbələrin tətbiqi bilik və bacarıqlarını inkişaf etdirmək məqsədi daşıyır.
Müsabiqədə Azərbaycanla yanaşı, Çin, Yaponiya, Tailand və Filippin kimi Asiya regionunun müxtəlif ölkələri iştirak edib. Bu da Azərbaycanın Asiya regionunun kosmik ekosisteminə uğurla inteqrasiya etdiyinin nümunəsidir.
Bu uğur Azərbaycanın kosmos, mühəndislik, STEAM və elmi sahələrdə artan nüfuzunu və kadr potensialını əks etdirir.