2012-ci ildən Azərbaycanda mərkəzləşdirilmiş qaydada buraxılış imtahanları keçirilir. O dövrdəki mənzərə ilə indiki vəziyyət müqayisəolunmazdır. 2017-ci ildə ilk dəfə yeni kurikulumla təhsil alan 9-cu sinif şagirdləri üçün buraxılış imtahanı keçirilib. Həmin vaxt imtahan iki mərhələdən - açıq və qapalı suallardan ibarət olub”.
“Tehsil365” xəbər verir ki, bunu Dövlət İmtahan Mərkəzinin (DİM) İdarə Heyətinin sədri Məleykə Abbaszadə “2024-ci il üçün ümumi təhsil müəssisələri üzrə buraxılış imtahanlarının nəticələrinin elmi-statistik təhlili” ilə bağlı keçirilən tədbirdə çıxışı zamanı deyib.
O bildirib ki, pandemiya dövründə isə bu model məcburən dəyişdirilib və təkmilləşdirilmiş yeni model indi də tətbiq edilib: “Buraxılış imtahanları ilə bağlı cəmiyyətdə tez-tez suallar səslənir. Bu suallardan biri də imtahanların müxtəlif günlərdə təşkil olunması ilə bağlıdır.
2024-cü ildə 9-cu sinif buraxılış imtahanı üç dəfə keçirilib, bu il isə iki dəfə təşkil olunub. Bir gündə 100 min şagirdin imtahan verməsi mümkün deyil. İmtahanların bir gündə keçirilməsi təkcə Dövlət İmtahan Mərkəzindən asılı deyil, bu həm də bizimlə işləyən təşkilatlardan da asılıdır. Həmçinin logistika baxımından bu, real deyil. Yəqin ki, bu, nə vaxtsa mümkün olacaq”.