Təhsil və sənaye sahələrində universitet–sənaye əməkdaşlığının gücləndirilməsi məqsədilə Mingəçevir Dövlət Universiteti (MDU) və Qafqazın ən iri enerji müəssisələrindən biri olan “Azərbaycan İstilik Elektrik Stansiyası” Məhdud Məsuliyyətli Cəmiyyəti (“Azərbaycan İES” MMC) arasında əməkdaşlıq memorandumu imzalanıb. Memorandumu MDU-nun rektoru Anar Eminov və “Azərbaycan İES” MMC-nin direktoru Təhmasib Hüseynov imzalayıblar.
Tehsil365 qeyd edir ki, Təhmasib Hüseynov enerji sahəsində peşəkar kadr hazırlığında MDU-nun mühüm rol oynadığını bildirib. O, universitetlə əməkdaşlığın ölkəmizin enerji sektorunun daha da güclənməsi və müasir tələblərə uyğun peşəkar kadrların yetişdirilməsinə ciddi töhfə verəcəyini qeyd edib. T.Hüseynov bu əməkdaşlığın həm müəssisənin kadr təminatı, həm də innovativ və texnoloji yeniliklərin tətbiqi baxımından strateji əhəmiyyət daşıdığını vurğulayıb.
Rektor Anar Eminov sənayeyə inteqrasiya edilmiş tədris modelinə keçidin universitetin əsas prioritetlərindən olduğunu qeyd edib. O, bu əməkdaşlığın tələbələrin nəzəri biliklərinin praktiki bacarıqlarla zənginləşdirilməsinə və universitetin tətbiqyönümlü təhsil müəssisəsi kimi fəaliyyətinə böyük dəstək olacağını bildirib. A.Eminov həmçinin əməkdaşlığın universitet və müəssisə arasında elmi-tədqiqat və innovativ layihələrin inkişafına təkan verəcəyini, nəticədə təhsil və istehsalatın sıx əlaqəli fəaliyyət göstərəcəyini vurğulayıb.
Memorandumun əsas məqsədi peşəkar kadr hazırlığını gücləndirmək, təhsil və istehsalat sahələri arasında əlaqələri dərinləşdirmək və ölkənin sənaye potensialına dəstək verməkdir. Bu çərçivədə tələbələrin müəssisədə istehsalat təcrübəsi keçməsi, mütəxəssislərin tədris prosesinə cəlb edilməsi və birgə elmi-tədqiqat layihələrinin həyata keçirilməsi nəzərdə tutulur. Eləcə də universitetdə magistr dissertasiyalarının müəssisənin ehtiyaclarına uyğunlaşdırılması, tədris proqramlarının yenilənməsi və universitetin Təhsil Mərkəzinin “Azərbaycan İES”də açılması planlaşdırılır.
Memorandum 5 il müddətində fəaliyyət göstərəcək və bu müddət ərzində tərəflər əməkdaşlığın daha da genişləndirilməsi üçün lazımi tədbirləri həyata keçirəcəklər.