MDU "Azərbaycan İES" MMC ilə yeni universitet-sənaye əməkdaşlığı modeli qurur
Təhsil və sənaye sahələrində universitet–sənaye əməkdaşlığının gücləndirilməsi və yeni modulu qurmaq məqsədilə Mingəçevir Dövlət Universiteti (MDU) və Qafqazın ən iri enerji müəssisələrindən biri olan “Azərbaycan İstilik Elektrik Stansiyası” Məhdud Məsuliyyətli Cəmiyyəti (“Azərbaycan İES” MMC) arasında əməkdaşlıq Memorandumu imzalanıb. Memorandumu MDU-nun rektoru Anar Eminov və “Azərbaycan İES” MMC-nin direktoru Təhmasib Hüseynov imzalayıblar.
“Tehsil365” xəbər verir ki, buna uyğun olaraq 2025-ci ilin 15 iyul tarixində rektor Anar Eminovun rəhbərlik etdiyi universitetin nümayəndə heyəti “Azərbaycan İES” MMC-nin baş idarəetmə binasında olublar. Dəyirmi masa ətrafında keçən görüşdə stansiyanın rəhbər şəxsləri də iştirak ediblər.
Universitet-sənaye əməkdaşlığından məmnunluğunu ifadə edən T.Hüseynov ölkəmizdə enerji istehsalında ixtisaslı kadrların yetişdirilməsində MDU-nun müstəsna rol oynadığını diqqətə çatdırıb. Stansiya direktoru MDU ilə bağlanan əməkdaşlıq sənədinin müəssisənin gələcəkdə peşəkar kadr təminatı və innovativ yanaşmaların tətbiqi baxımından əhəmiyyətini vurğulayıb
Rektor Anar Eminov sənayeyə inteqrasiya olunmuş tədris modelinə keçidin MDU-nun strateji hədəfləri arasında olduğunu bildirib. O, bu əməkdaşlığın tələbələrin praktiki bacarıqlarının formalaşdırılması və universitetin tətbiqyönümlü ali təhsil müəssisəsinə çevrilməsi baxımından önəmli rol oynayacağını vurğulayıb. MDU rəhbəri həmçinin, imzalanan Memorandumun real əməkdaşlıq addımlarının atılması üçün yol xəritəsi rolunu oynadığını qeyd edərək, əməkdaşlığın qurulmasında göstərilən dəstəyə görə “Azərbaycan İES” MMC rəhbərliyinə təşəkkürünü bildirib.
Sonra, MDU ilə “Azərbaycan İES” MMC arasında sənaye yönümlü (Energetika mühəndisliyi, Elektrik və elektronika mühəndisliyi) ixtisaslar üzrə peşəkar kadrların hazırlanmasına dair birgə əməkdaşlıq haqqında Memorandum imzalanıb.
İmzalanmış Memorandum sənaye yönümlü – xüsusilə Energetika mühəndisliyi və Elektrik və elektronika mühəndisliyi – ixtisasları üzrə peşəkar kadrların hazırlanmasını, elmi-tədqiqat və innovasiya fəaliyyətlərinin təşviqini, həmçinin müasir istehsalatla təhsilin inteqrasiyasını hədəfləyir.
Memorandumun əsas məqsədi elmi biliklərlə istehsalat təcrübəsinin sintezini təmin etməklə ölkənin sənaye potensialına töhfə verə biləcək kadrların hazırlanması, innovasiya fəaliyyətinin inkişaf etdirilməsi və qarşılıqlı resurs mübadiləsinin təşkili kimi strateji istiqamətləri əhatə edir.
Əməkdaşlıq çərçivəsində nəzərdə tutulan əsas istiqamətlər tələbələrin “Azərbaycan İES” MMC-də istehsalat təcrübəsi keçməsi və dərslərin praktiki hissəsinin müəssisənin Tədris Mərkəzində təşkili, müəssisənin mütəxəssislərinin tədris prosesinə cəlb olunması və universitet müəllimlərinin istehsalat prosesinə inteqrasiyası, birgə elmi-tədqiqat layihələrinin həyata keçirilməsi və müasir enerji problemlərinə dair innovativ həllərin hazırlanması, magistrlik dissertasiyası mövzularının müəssisənin ehtiyaclarına uyğun müəyyənləşdirilməsi və müəssisədən də elmi rəhbər təyin olunması, müvafiq ixtisasların tədris proqramları və sillabuslarının stansiyanın tələblərinə uyğunlaşdırılması, dərs vəsaitlərinin birgə işlənilməsi, energetika mühəndisliyi və elektrik və elektronika mühəndisliyi ixtisaslarının sənaye yönümlü proqram əsasında yenilənməsi, universitetin stansiyada Təhsil Mərkəzinin açılması, eləcə də kadrların ixtisasartırması, bilik və bacarıqlarının yenilənməsi, istedadlı gənc mütəxəssislərin seçilməsi və gələcəkdə işlə təmin olunmasından ibarətdir.
Baş tutan imzalanma mərasimindən sonra rektor Anar Eminovun rəhbərlik etdiyi universitet nümayəndə heyəti “Azərbaycan İES” MMC-nin maddi-texniki bazası, infrastrukturu, Təlim-Tədris Mərkəzi və inzibati binası ilə yaxından tanış olublar.
Qeyd edək ki, bu əməkdaşlıq çərçivəsində tərəflər elmi-tədqiqat və innovasiya fəaliyyəti, təcrübə proqramları, insan resurslarının inkişafı, sosial və ictimai təşəbbüslər sahəsində birgə fəaliyyət göstərəcəklər. Memorandum beş illik müddət üçün bağlanıb və növbəti mərhələlərdə davamlı əməkdaşlıq mexanizmlərinin qurulmasını nəzərdə tutur.