İyulun 22-də Pirallahı Rayon İcra Hakimiyyətinin təşkilatçılığı ilə “Konstitusiya və Suverenlik İli” çərçivəsində “Milli mətbuatın 150 illik inkişaf yolu: keçmişdən gələcəyə” adlı konfrans keçirilib.
Əvvəlcə tədbir iştirakçıları Pirallahı Rayon İcra Hakimiyyətinin inzibati binasında Ümummilli Lider Heydər Əliyevin büstü önünə gül dəstələri düzərək onun xatirəsini ehtiramla yad ediblər.
Konfrans Dövlət Himninin səsləndirilməsi, Ümummilli Lider Heydər Əliyevin və şəhidlərin xatirəsinin bir dəqiqəlik sükutla anılması və mövzu ilə bağlı videoçarxın nümayişi ilə açıq elan olunub.
“Tehsil365 “xəbər verir ki, tədbirdə çıxış edən Milli Məclisin deputatı, “İki sahil” qəzetinin baş redaktoru Vüqar Rəhimzadə “Əkinçi” qəzetinin nəşri ilə əsası qoyulan milli mətbuatın keçdiyi şərəfli inkişaf yolundan bəhs edib. O, Azərbaycanda sağlam və peşəkar mətbuatın formalaşmasında, söz və mətbuat azadlığının təminində Ümummilli Lider Heydər Əliyevin müstəsna xidmətlərini qeyd edib. Bildirib ki, 1993-cü ildə Ulu Öndərin hakimiyyətə qayıdışı milli mətbuatın inkişafında yeni mərhələ açdı, 1998-ci ildə dövlət senzurasının ləğvi isə söz və mətbuat azadlığının təmininə güclü təkan verdi.
Daha sonra AMEA Nizami Gəncəvi adına Ədəbiyyat İnstitutunun şöbə müdiri professor Vüqar Əhməd çıxış edərək milli mətbuat tariximizin yalnız informasiya vasitəsi deyil, xalqın mənəvi yaddaşı və milli ideologiyanın daşıyıcısı olduğunu vurğulayıb. O, “Əkinçi”dən bu günə qədər milli düşüncə, maarifçilik və azərbaycançılıq ideyasının formalaşmasında mətbuatın mühüm rol oynadığını qeyd edib. Həmçinin elmi tədqiqatlar və arxiv sənədləri əsasında hazırlanan monoqrafiyaların tədqiqatçılar və gənc nəsil üçün əhəmiyyətini diqqətə çatdırıb.
Filologiya üzrə fəlsəfə doktoru Gülnar Səma çıxışında media ilə cəmiyyət münasibətləri çərçivəsində maarifçi ənənələrin qorunması və ədəbiyyatla mətbuatın qarşılıqlı təsirindən danışıb. O, müasir informasiya çağırışları fonunda bu harmoniyanın vacibliyini, medianın ədəbi və ideoloji dəyərlərlə zənginləşdirilməsinin cəmiyyətin sağlam informasiya ilə təminatında mühüm rol oynadığını bildirib.
Daha sonra dosent Gülbəniz Babayeva və tədqiqatçı Leyla Məmmədova milli mətbuat tariximizin zəngin irsə malik olduğunu qeyd edərək bu irsin qorunmasının və yeni nəsillərə ötürülməsinin əhəmiyyətindən danışıblar. Klassik mətbuat nümunələrinin öyrənilməsi və onların müasir dövrdəki aktuallığının araşdırılması vurğulanıb.
Sonda çıxış edən Pirallahı Rayon İcra Hakimiyyətinin başçısı Vasif İmanov mətbuat işçilərini təbrik edərək, onlara fəaliyyətlərində uğurlar arzulayıb. Vasif İmanov qeyd edib ki, Prezident İlham Əliyevin 2020-ci il Vətən müharibəsində verdiyi müsahibələr və çıxışlar Azərbaycan mediasının inkişaf istiqamətlərini müəyyən edib. Prezidentin təşəbbüsü ilə Şuşada keçirilən Qlobal Media Forumu isə beynəlxalq miqyasda mühüm hadisəyə çevrilib.
Tədbirin sonunda rayonun ictimai-siyasi həyatında fəal iştirak edən bir sıra şəxslər Pirallahı Rayon İcra Hakimiyyətinin başçısının fəxri fərmanları ilə təltif olunublar.
