Müasir təhsil sistemində məktəblilər və tələbələr günün böyük hissəsini masa arxasında oturaraq keçirirlər. Bu isə onların yalnız təhsil deyil, eyni zamanda sağlamlıq baxımından da ciddi fəsadlarla üzləşməsinə səbəb olur.
Mütəxəssislər bildirirlər ki, uzunmüddətli oturaq həyat tərzi beyində qan dövranını zəiflədir. Bu, xüsusilə dərs zamanı diqqətin dağılması, yaddaşın zəifləməsi və tez-tez baş ağrıları kimi problemlərlə nəticələnir. Tələbələrin və şagirdlərin hər gün saatlarla ekran qarşısında və masa arxasında oturması onların psixoloji və fiziki sağlamlığı üçün təhlükə yaradır.
“Tehsil365” xəbər verir ki, monitorinq nəticələrinə görə, ibtidai sinif şagirdlərində 29%, orta və yuxarı sinif şagirdlərində isə 45%-ə qədər görmə zəifliyi müşahidə olunur. Bu hal daha çox düzgün olmayan oturuş, boyun və kürək əzələlərinin həddindən artıq yüklənməsi nəticəsində baş verir. Başın daim aşağı əyilməsi görmə sinirlərinə təzyiq göstərir və bu da zəif görməyə səbəb olur.
Tələbələrdə isə vəziyyət daha da kritikdir. Universitet auditoriyalarında, yataqxanalarda və kitabxanalarda uzun müddət hərəkətsiz qalmaq onurğa sütununda patoloji dəyişikliklərə: skolioz, kifoz, lordoz və s. kimi xəstəliklərin formalaşmasına yol açır. Eyni zamanda fiziki aktivliyin azalması və idmana kifayət qədər vaxt ayrılmaması bu problemləri daha da dərinləşdirir.
Məktəblilər və tələbələr arasında oturaq həyat tərzinin yaratdığı sağlamlıq fəsadları artıq epidemiya səviyyəsində yayılıb. Hər 10 gəncdən yalnız 2-si məktəbi və ya universiteti heç bir sağlamlıq problemi olmadan başa vurur.
Təhsil sistemi təkcə bilik deyil, sağlam vərdişlər də aşılamalıdır. Hərəkətli dərs metodları, fasilələrlə hərəkət, sağlam oturuş texnikalarının təbliği və təhsil məkanlarının ergonomik şəraitə uyğunlaşdırılması vacib zərurətə çevrilib.