Bakı Dövlət Universitetinin (BDU) həmtəşkilatçılığı ilə Qubada “Konstitusiya və Suverenlik İli”nə həsr olunmuş Yay düşərgəsinin açılışı olub. Düşərgə tələbələr və şəhid-qazi övladlarının birgə iştirakı ilə baş tutub.
Bakı Dövlət Universitetinin “Tehsil365”ə məlumat verib ki, tədbir BDU, İslam Əməkdaşlıq Təşkilatı (İƏT) Gənclər Forumunun Avrasiya Regional Mərkəzi, “BDU könüllüləri” təşkilatı və “Əmanət” Şəhid və Qazi Övladlarının Fərdi İnkişafına Dəstək Layihəsinin birgə təşkilatçılığı ilə həyata keçirilib.
Açılışdan öncə düşərgə iştirakçıları Quba şəhərinin mərkəzində ucaldılmış Ulu Öndər Heydər Əliyevin abidəsini ziyarət edib, önünə gül dəstələri qoyublar.
Düşərgənin rəsmi hissəsində çıxış edən BDU-nun Humanitar məsələlər və gənclər siyasəti şöbəsinin müdiri Ramin Səmədov düşərgəni açıq elan edib. O, “BDU könüllüləri” təşkilatının universitetin ictimai və vətənpərvərlik yönümlü layihələrində fəal rol oynadığını vurğulayıb. Ramin Səmədov bu cür tədbirlərin gənclərin milli-mənəvi dəyərlər ruhunda formalaşmasına, onların sosial məsuliyyətlərinin artmasına töhfə verdiyini qeyd edib. Daha sonra o, düşərgənin proqramı haqqında iştirakçılara ətraflı məlumat verib.
İƏT Gənclər Forumu Avrasiya Regional Mərkəzinin baş direktorunun müavini Ramin Həbibzadə çıxışında düşərgənin təşkilində əməyi olan qurum və şəxslərə təşəkkürünü bildirib, iştirakçılar üçün yaradılan imkanlardan danışıb.
“Əmanət” Layihəsinin rəhbəri Sərxan Bağırlı isə bu təşəbbüsün gənclərin və uşaqların fərdi inkişafına xidmət etdiyini diqqətə çatdırıb. O, bunun layihə çərçivəsində keçirilən beşinci Yay düşərgəsi olduğunu qeyd edib.
Qeyd edək ki, 26-29 iyul tarixlərini əhatə edən düşərgə BDU-nun Qubadakı Tədris-Təcrübə və İstirahət Mərkəzində keçirilir. Proqram çərçivəsində təlimlər, məlumatlandırıcı sessiyalar, mədəni tədbirlər və əyləncəli fəaliyyətlər nəzərdə tutulub.
