Son illərdə mütəxəssislər təhsilin və səhiyyənin sərhədlərinin kəsişməsində yaranan problemlərə xüsusi diqqət ayırırlar. Ali məktəblərdə təhsil alan tələbələrin fiziki, psixi və mənəvi sağlamlığı müxtəlif mənfi amillərin təsirinə məruz qalır.
Tehsil365 xəbər verir ki, xüsusilə tələbə mühitində yaranan stress, informasiya gərginliyi, tədris yükünün qeyri-bərabərliyi, sosial adaptasiya çətinlikləri gənclərin psixi sağlamlığını təhlükəyə atır. Bu vəziyyət frustrasiya, depressiya, nevroz və digər psixosomatik xəstəliklərə gətirib çıxara bilər.
Gənclər arasında sağlamlığa zərər verən davranışlar nikotin, alkoqol və narkotik vasitələrin istifadəsi də artmaqdadır. Bunun əsas səbəblərindən biri tələbələrin öz fəaliyyətlərinin nəticələrindən narazı qalması, sosial dəstək almaması və mühitə uyğunlaşmada çətinlikləridir.
Mütəxəssislər vurğulayır ki, tələbələrin psixi sağlamlığının qorunması üçün onların müsbət gözləntilərinin gücləndirilməsi, stressin qarşısını almaq üçün fərdi və sosial müdafiə mexanizmlərinin inkişaf etdirilməsi vacibdir. Sosial dəstəyin təmin olunması həm müəllimlər, həm də tələbə yoldaşları tərəfindən stressin azaldılmasında əhəmiyyətli rol oynayır.
Ali təhsil müəssisələri tələbələrin sağlamlığının qorunması və sosial inkişafının təmin olunması istiqamətində daha fəal olmalı, gənclərin sosial adaptasiyasını dəstəkləyəcək tədbirlər həyata keçirməlidir.